Ang kayutaan nga gipalit sa dakbayan atul sa termino ni kanhi Mayor Alvin Garcia pwerteng dakua. Apan mao lagi, daghan usab niini ang dili kapahimuslan kay lisud kaayo mapuy-an og tawo.
Ang maong mga lugar hangtud karon walay kuryente, walay tubig ug wala pa’y karsada nga kaagian paingon sa dapit kun dunay tawo nga mohukom nga adto mopuyo.
Kun yuta lang ang hisgotan, ang dakbayan duna man gani’y 11 ka hektareyas nga gipalit didto sa barangay Cambinocot nga gibayran sa City Hall ug pila to ka milyon ka pesos.
Kadto man gani maoy giingong rason nga usa ka barangay kapitan naghikog kay ang report mao nga nalambigit kini pagbaligya sa yuta nga namatud-an nga kabahin pa diay sa watershed project.
Gihisgotan ko kini tungod kay ang dakbayan sa Sugbo pagka karon ingon sa naglisud pagpangita og dapit nga kabalhinan sa mga lumulopyo nga kang kansang kabalayan maigo sa pagpatuman og mga development projects.
Usa ka consultant sa dakbayan miingon nga ang ubang dapit nga gipalit sa dakbayan lisud kaayo i-develop kay dunay mga grabe kaayo kabakilid.
Aw, makapaduda lagi kun nganong gipalit man sa dakbayan ang maong mga yuta nga dili man unta kini mapahimuslan. Dili nato malikayan nga dunay magduda nga may mga opisyal kaniadto nga naka-komisyon sa halin.
Buyno, kay naa na man g’yod kining maong mga yuta, ang maayo nga ato na lang kining atimanon. I-develop nato kining maong yuta pinaagi sa pagbutang og karsada, kuryente ug tubig.
Kun matuman kini, daghan g’yod kaayo ang maglumba sa pagpuyo kay ang tinuod, nindot kaayo puy-an ang bukid. Ako lang, dia na man ko magpuyo sa bukid nga nag-umbaw sa kinaubsan.
Bantang kaayo sa akong panan-aw ang mga eroplano nga molupad ug motugpa diha sa Mactan, presko nga hangin ang imong mahanggap, mingaw dili sama diha sa magahob nga dakbayan.
Mao nga usbon nako, ang mga opisyal sa dakbayan kinahanglan nga imbis mamalit og dugang mga yuta nga papuy-an sa mga urban poor, i-develop na lang ang kayutaan sa syudad.
* * *
Mora’g may kausaban ang politika diha sa Mandaue da. Gituboy ni Kongresista Nerissa Soon-Ruiz nga mopuli sa iyang pwesto si bise mayor Carlo Fortuna. Angayan g’yod si Carlo nga mag congressman.
Aw nindot usab nga si Kongresista Ruiz maoy mopuli pagka mayor. Walay problema. Ang nadunggan god nako nga si kanhi mayor Thadeo Ouano wala pay gana nga mobalik sa politika.
Si Jonkie Ouano usab nalingaw na kaayo sa iyang negosyo. Si Lollipop Ouano-Dizon, ang gwapa nako nga higala ug anak sa kanhi mayor, mora’g molansar ra sa pagka konsehal.
Na hala, fight g’yod. Kini hinoon si Kongresista Ruiz takus usab kaayo nga mopuli pagka mayor. Ang iyang amahan nga si Dr. Cristituto Soon-Ruiz maoy mayor kaniadto sa Mandaue nga walay dautang rekords.
* * *
Hisgutan ra god nato’g gamay si Senador Panfilo Lacson. Sayop man god ang pagtoo sa uban. Usa ka suod kaayo ni Lacson mitug-an nako nga dili kwarta ang rason sa senador nga dili na modayon paglansar isip presidente.
Ang labing bug-at nga rason sa pag-atras ni Lacson mao ang tinguha ni kanhi presidente Joseph Estrada sa paglansar pagbalik sa pagka presidente.
Dili makahimo si Lacson pakig-atbang sa tawo nga maoy nakapadali nga nahimo siya nga PNP chief ug naghatag kaniya og dakung gahum kaniadto.
Kun si Estrada modagan, may posibilidad pa gani nga si Lacson ang mag-bise presidente ubos sa iyang partido.