Sobrang media treatment sa pagbinaboy ni Halili

Tan-aw nako, morag sobra ra kaayo ang treatment sa media sa kaso ni Halili. Ambut ngano! Lalim gikan sa buntag, udto, hangtud na sa halawom nga takna sa kagabhion – magkaadlawon na lang pod, Halili lang gihapon. Ug kini, mo-duha na ka semana. Ngano man?

Utro sad ang Senado, misalida pod. Pakapinan adtong nagpa-hero-hero, mibubo og tubig sa ulo ni Kho .. samot. Ambut nangaunsa na ta ini. Akong ma-imagine nga sa unang panahon, mag-apil-apil ba kaha ang mga Senador niini … sila si Camilo Osias, Claro Recto, Amang Rodriguez, Gil J. Puyat, Arturo Tolentino, Aytona, Sumulong, Pelaez, Manahan, Manglapus, ug Ninoy Aquino …. mosugot kaha to sila nga mag-NBI ang Senado ug mag-grandstanding, mag-usik-usik sa panahon ug salapi sa lungsod ug sa dungganang Senado – aron pagsota kun nganong gibinaboy si Halili ni Kho?

Pastilan, Dro, kadaghan ug kadagko sa mga suliran nga giatubang ug gisagubang karon, di lang sa atong nasud, kondili, sa tibuok gyud nga kalibutan … and here comes the honorable men and women of the lawmaking body of the land, migahin gyud og special nga panahon, aron pagsota giunsa ni Kho si Halili.

Si Enrile, as Senate President, ambut ngano nga misugot man sad siya niini nga matang sa salida sa Senado. While ang Senado, adunay katungod paghimog mga imbestigasyon, apan, dili nila hikalimtan nga primarily, una nilang katungdanan mao ang pagpanggamag balaod – ug alang nako, kining ila karong gihimo, in aid of legislation, wa kinahanglana.

Mark my word, wa gyud tay mapaabot nga kaayohan sa lungsod tapus ning maong imbestigasyon, sama sa daghan kaayong mga imbestigasyon nga ghimo sa Senado in the past. Unsa man tuoy mapaabot sa lungsod gikan nila ni Halili ug Kho? 

Ug ngano man tuod nga gipadako man nig maayo sa media? Mao ba ni ang ilang giingon nga “development communication?” Pastilan, pilay gasto sa mga media network pag-cover niining maong paghilak-hilak sa usa ka babaye nga kono gibinaboy?

Ambut sa uban, apan alang nako, sobra ra gyud kaayo ang atong treatment niini. Ato na lang ning itugyan ngadto sa mga ahensiya sa gobiyerno, not necessarily the Senate, paghimog imbestigasyon. Unya, inighuman sa imbestigasyon, mao pay i-come in sa media pagpahibawo sa resulta niini. Ug mahimo nga atong buboan si Kho bisag usa pa ka barrel nga tubig, after the investigation.

Sa ako nang giingon, daghan kaayo tang giatubang nga mga concern. Ug kini karong gihimo sa media pagtutok sa on-going investigation nila ni Halili ug Kho, alang nako, sobra da. Makapangutana ta, ngano man gyud?