Binuang hunonga na uy

Angay g’yod nga bantayan ni LTO-7 regional director Raul Aguilos ang iyang mga sakop diha sa operations branch nga dili makahimo og binuang.

Bisan ako nakadawat og report, gikan mismo sa ilang mga kauban diha, nga may mga badlongon nga mokuha lang sa dinakpan nga mga lisensya nga ang bayad idiritso ra nila pagbutang sa bulsa.

Resulta, kadtong mga drayber nga makabayad nga dili na mangayo og resibo, aw makurat na lang kun dili sila maka-renew sa ilang lisensya kay duna pa may pending nga violations.

Tan-aw hinoon nako, leksyon usab kini sa mga madakpan nga drayber nga hilig kaayo nga mopakuot sa ilang lisensya tungod kay wala sila masayod nga magpabilin ra gihapon ang ilang violations.

Kini maoy rason nga sila si Aguilos ug ang iyang assistant direktor nga si Edgar Catarungan gipasakaan og kaso didto sa Ombudsman.

Kun imong tan-awon pag-ayo ang maong dukomento sila si Aguilos ug Catarungan wala g’yod labot sa nahimo sa ilang sakop. Apan ang argumento sa mipasaka og kaso nga apil sila kay sila man ang nagtudlo sa maong mga kawani sa pwesto.

Maayo usab nga tan-awon sa Ombudsman ang pangangkon sa complainant nga ang tawo nga gibutang ni Aguilos isip acting chief diha sa operations branch, dili kuno haum sa pwesto.

Apil nga gireklamo g’yod mao ang adjudication officer nga giingong “utility personnel.” Miingon na man hinuon si Aguilos nga sayop ang pangangkon sa complainant.

Alang sa nagdumala diha sa operations branch, kinahanglang wala g’yoy “kuot-kuot” sa mga lisensya nga itugot. Tungod niining mga pagduda nga dunay binuang diha sa mga masakmit nga lisensya, maayo tingali nga himoan kini og pakisusi sa Commission on Audit.

Kun dunay maisyu nga Temporary Operators Permit ngadto sa mga drayber, dili gayod i-release ang lisensya gawas kun nabayran na ang “fines” ug naisyuhan og resibo sa kagamhanan.

* * *

Duna kuno’y drayber sa motor nga dili gustong magpadakop sa usa ka traffic enforcer kay wala kini mag-helmet, nagpagukod ug nadasmag.

Ang akong ikasulti niini, Maayo Ra! Kun ako ang makadakop niining maong matang sa drayber, ihurot g’yod nako pag-cite kaniya ang tanang violations aron daku siya og mabayad nga multa.

* * *

Kapila na ko moingon nga kun moinsister gani kamo nga mohimo’g salaud, pinaagi sa diili pagtuman sa mga lagda sa Transportation and Traffic Code, ayaw pagsibat kun kamo sitahon na sa mga traffic o kaha transportation agents.

Tan-awa kadtong drayber og motor nga buot mosibat, ug gidam-agan ang usa ka LTO agent didto sa A.S. Fortuna, Mandaue kaniadtong miaging semana, gawas nga gikulata sa mga “standby” nakabayad pa.

Daku siya og nabayad sa multahan ug nakabayad pa og P7,000 ngadto sa LTO agent kang kansang Eyeglasses nabuak sa pagdasmag niya ug sa mga tambal.

Dili ba daku na ang problema? Diha man ko atul sa maong higayon. Kun wala pa nako badlonga ang mga standby nga buot na mohasmag sa maong abusadong drayber, ambot maunsa kaha siya.

Nasayod na man kamo sa mga tawo nga kun duna gani’y snatchers ug mga badlongon nga madakpan moapil man g’yod og modayon pagkulata. Mao nga nakulatahan g’yod ang maong drayber.