Reklamo batok CTMS

Kun wala ko masayop, nakahisgot na kita bahin sa CTMS dinhi sa atong lindog. Karon subli nato kining hisgotan tungod niining laing text reklamo nga atong nadawat nga alang kanako, angay gyod hatagan og pagtagad. Apan akong klarohon nga wala nato kondenaha ang CTMS. Bukas kining lindog alang sa ilang habig kun gusto silang mopadayag sa ilang reaksiyon kalabot sa mga reklamo nga gipadangat dinhi kanato.

Ang text nagkanayon: "Good day, Sir. Kanang mga CTMS diha sa Opon sa may Acasia, ba. Kusog kaayong mamadlong nianang mga jeep nga magpakanaog og pasahero. Bisan wa pa mahurot og naog ang mga pasahero kay palargahon na. Pero kun mohatag kag P20 sa CTMS paparkingon ka bisan no stopping. Ang style sa pagkuha sa P20 kay sugoon ra sa CTMS ang dispatser." -- 0920-6098738

Dili ko mosakay sa pasangil sa atong texter. Atong hatagan og higayon ang CTMS sa pagtubag ning maong pasangil sa dili pa ko mohatag sa akong komentaryo. Ang uban moingon tingali nga gamay ra kining maong butang apan gipunit ko kining maong gamay nga isyu tungod kay mahimo man kining dako kun tinuod man ugaling ang pasangil sa atong texter. Angay mopasabot ang CTMS sa ilang habig aron maklaro ang tanan.

Tinuod ba nga mangolekta gyod og P20 ang CTMS ug ang mga dispatser maoy pakobrahon? Kinsa man ang manghimakak ug kinsa man usab ang momatuod niini? Kun tinuod man, nagpasabot ba nga nakigkunsabo ang CTMS sa dispatser? Maglisod kog tuo niini. Para asa man kanang P20? Angay kitang hatagan og katin-awan niini. Paaboton nato ang tubag sa CTMS dinhi sa atong lindog kun ugaling ganahan silang motubag.

* * *

Sa laing bahin: "Good day. Naa lang koy reklamo sa among security agency. Wa may pay slip kada suweldo. Deduct sa SSS ug Philhealth. Kapin na ko sa one year. Mangayo mig pay slip, wa gyod." -- 0921-9548122

Kun aduna ikaw ing gihuptang mga dokumento o kalig-onan nga ikaw gipahamtangan og deduction ang suweldo alang sa SSS ug Philhealth contribution unya wala kini i-remit, puyde kang mopasaka’g reklamo. Pero lisod kun wala kay kalig-onan ilabi na nga wala man kahay pay slip nga ihatag ang inyong agency.

(Sumbong ug reklamo? Text sa 0910-8105522).