Papirmahon ang mga trabahante

Duna gyoy ubang mga employer nga manikas ug magpahimulos sa kusog sa ilang mga trabahante. Dili maihap sa mga tudlo sa mga tiil ug kamot ang mga employer nga naghatag og ubos nga suholan ngadto sa ilang mga trabahante. Ang suweldo nga ilang gihatag ubos ra kaayo sa gilatid sa balaod. Pero kanunay walay dag-anan ang trabahante. Kun moreklamo siya batok sa dayag nga pamentaha, lagmit makulban siyag kaldero. Mao nga ang kadaghanan moduko na lang og magpaawot.

Dugtong niini, usa ka magbabasa ang mi-text nga nagkanayon: "Good day. Sir. Ang akong problema bahin sa akong work. Ni-text ko nimo kay nakabasa ko sa imong column. Nagtrabaho ko sa usa ka bakeshoppe since April 1, 2006 hangtod sa July 20, 2007. Daghan silag binuang sa mga trabahante nila. Kaming tanan papirmahon nila nga P241 ang rate sa suweldo pero dili kana tinuod. Sa tinuod lang, P148 lang ang entrance. Ang akong suweldo miabot og P181 ang rate. Pero ang pirmahan namo nga suweldo P241. Ang maong daily record 9 hours ang duty ug straight gyod. Dili mi hapit makakaon. Pero ang ipasulat nila sa DTR kay 8 hours lang. Gipapirma mi nila og cash voucher nga walay nakasulat nga kantidad gawas lang sa among pirma. Gibalhin ko nila sa hinay nga branch sa ilang bakeshoppe." -- 0918-4381720 (Sent: 02:51:46--September 1, 2007)

Gihatag sa atong texter ang kompletong ngalan sa bakeshop nga iyang gitrabahoan apan ato lang unang gipugngan in fairness sab ngadto sa tag-iya ug tagdumala niini. Ihatag lang nako ang clue sa ngalan niini aron makabaton og ideya ang tag-iya niini ug makamatngon nga duna nay trabahante niya nga wala makauyon sa iyang pagpamentaha sa ilang kusog. Ang clue mao nga ang maong bakeshop gisunod sa ngalan sa usa ka santo. Ubay-ubay na kinig branches dinhi sa Metro Cebu.

Kun maoy atong tuohan ang pasangil sa texter nga nakatrabaho sa maong bakeshop, ubay-ubay ang nahimong kalapasan sa tag-iya o tagdumala niini. Nindot unta kun makahipos ang mga trabahante og dokumento nga mopalig-on sa ilang pasangil. Labing maayo nga makuha ninyo ang kopya sa inyong gipirmahan nga P241 ang inyong suweldo bisan ang tinuod P148 ug P181 ray inyong nadawat. Idangop ninyo kini sa NLRC.

(Sumbong ug reklamo? Text sa 0910-8105522).