Reklamo batok traffic enforcer

Niining bahina sa akong lindog, tugoti nga akong hatagan og luna kining reklamo sa usa ka magbabasa. Ang iyang reklamo batok sa traffic enforcer. Makadaghan na ko makadawat og reklamo nga ingon niini pero morag nalahi og diyotay kining maong reklamo sa atong texter.

Ang text nagkanayon: "Maayong buntag kanimo, Sir. Kining akong reklamo bahin sa mga traffic enforcer sa Mandaue nga magpataka na lang og panakop sa walay igong kapasikaran. Moisyu sila og no parking, no stopping ug no entry violations. Unya wala ra ba kay makita nga pasidaan sa maong area nga gidili ang pag-parking, paghunong ug pagsulod sa usa ka partikular nga dalan o karsada. Kun mangatarongan ka, laing isyu na sad, "arogante". Ingon ba niini kahigpit ang atong balaod? Hapit kada adlaw nga ilang himoon kini sa mga tricycle drivers kilid sa Metrobank atbang sa Marpha. Ug usa pa, wala pa man untay office hour. Daghang salamat." -- 0926-4733779

Akong klarohon nga wala pa ako motuo niining maong text nga akong nadawat. Labaw nang wala nako kondenaha ang enforcer kondili igo ra kong mihatag og pagtagad sa text nga akong nadawat. Maayong himoan og pakisusi kun unsa kini ka tinuod. Dili una ko mohukom.

Ang ako lang ikasulti bahin niining maong reklamo mao nga mosunod lang gayod kita sa mga lagda sa trapiko aron dili kita makasugat og problema. Pero kun himo-himoan gayod kitag violation bisan dili tinuod, angay na kitang mokisikisi niana kay dili na man kana makataronganon.

Tinuod nga higpit ang balaod alang niadtong mga malapason niini. Pero sakit sab kaayo kun ang balaod makalapas na pod sa tawhanong katungod. Mao nga dili sab unta mag-inestrikto pag-ayo ang mga mananakop. Natural man nga moreklamo o mangatarongan ang dakpon ilabi na kun iyang makita nga wala siyay nahimong violations. Pero aduna sab gayod hinuon ing nakahimog violation nga tinuod gayod nga arogante sa higayon nga madakpan.

Bahin sa mga tricycle drivers, adunay balaod nga nagdili kanila sa pagtaak sa usa ka partikular nga dapit sa siyudad. Basin diay kun nakalapas ang maong mga drayber sa maong balaod maong gidakop sila. Pero kun wala silay nalapas nga balaod, dayag nga dili makataronganon ang pagdakop kanila.

(Sumbong ug reklamo? Text sa 0910-8105522).