'Protektor' sa VK

Angayan mohimog pakisusi ang kadagkoan sa kapolisan kun wala bay mga polis nga nahilambigit sa operasyon sa video karera machine. Nakadawat man gud ko’g taho gikan sa usa ka magbabasa nga nanag-iya sa cellphone number 0922-4991735 nga adunay polis nga protektor sa video karera operations.

Akong klarohon nga wala ako motuo sa gitaho sa maong texter. Pero wala sab koy nakitang hinungdan nga magtumo-tumo siyag sulti. Mao nga angayan gayod nga himoan og pakisusi kining iyang gisumbong aron masuta kun tinuod ba gayod kini o dili.

Partikular nga gitumbok sa maong texter ang barangay Kamagayan nga matud pa niya, naghitak na pud ang video karera. May ngalan sa polis nga maoy iyang gitumbok nga protektor sa operasyon sa video karera sa Kamagayan apan ako lang unang gipugngan in fairness sab ngadto kaniya.

Kining maong polis, matud pa sa atong texter, gawas nga protektor sa video karera sa barangay Kamagayan, aduna pa gayod siya’y gipanag-iyang mga video karera machines. Dili lang usa kondili walo gayod ka buok ang video karera niining maong polis, matud pa.

Samtang dili pa kita kombinsido nga tinuod kini, maayong imbestigahon kini sa kadagkoan sa Cebu City Police Office (CCPO) ug sa ubang ahensiya sa atong kagamhanan nga gitahasan sa pagsumpo sa operasyon sa video karera.

Angay sab susihon sa kadagkoan sa kapolisan sa ubang mga dapit kun wala bay sakop sa buhatan sa polisya nga nahimong protektor sa modus operandi sa video karera.

* * *

Angayan pod himoan og pakisusi kun unsa ka tinuod ang sumbong nga gipadangat diri kanako nga adunay usa ka polis nga nag-sideline sa pag-drive og taxi. Ang atong magbabasa nga nanag-iya sa cellphone number 0920-6655563 maoy naghatod niining maong kasayoran kanako.

Gawas sa polis nga nalambigit sa operasyon sa video karera, may lain pa pod diay nga iresponsable sa iyang katungdanan. Kana lagi kun tinuod ang taho nga atong nadawat. Okey ra man unta kun mag-sideline siya’g drive kun wala siya’y duty. Pero sumala sa sumbong, mag-drive kining maong polis nga magsul-ob sa uniporme sa iyang pagka polis.

Dako kining insulto. Labaw sa tanan, maglisod ang maong polis pagtubag kun dunay alarma kun siya mag-drive og taxi atol sa iyang pag-duty ilabi na kun maatol nga may mosakay kaniyang pasahero. Maayong sutaon kun unsa kini ka tinuod.

* * *

 (Sumbong ug reklamo? Text sa 0910-8105522).