Lakbay aral

"Good day. Naa lang koy sentimento bahin sa lakbay aral sa mga barangay opisyal. Ang biyahe sa mga opisyal sa barangay nag-usik-usik lang sa kuwarta nga unta alang sa mga project ug ubang panginahanglanon sa katawhan sa barangay. 1.) Walay tambal ang center, 2.) nangaguba na ang kadalanan nga aspalto, 3.) ang mga kanal walay klarong drainage system ug daghan pa unta ang matabangan sa kuwarta nga ilang gigamit pag-travel. Sila ray nalipay paggasto sa kuwarta sa katawhan." -- 0921-2593624

Maayo baya ang tumong sa "lakbay" sa mga barangay opisyal kay sa dapit nga ilang adtoan mangobserbar man sila kun giunsa pagpalambo ang maong dapit. Daghan silag makat-onan nga ilang ika-apply sa pagpalambo sa tagsatagsa nila ka dapit kun ang lintunganay sa tumong sa pagbiyahe maoy ilang tumanon ug buhaton.

Ang nakadaot lang kay dili tanang brgy. officials maayo’g tumong sa ilang pagbiyahe. Naay uban nga lulinghayaw ray tuyo. May nailhan gani kong kapitan sa barangay nga sa pag-abot niya didto sa dapit diin sila nag-"lakbay" nagtagbaw siya sa iyang kaugalingon paggamit sa usa ka babayeng mubog lupad. Pastilan!

Dili kay kana ra. Naa gyuy daghang brgy. officials nga walay interes sa lintunganay tumong sa "lakbay." Kay inig-abot nila sa dapit, mosulod hinuon sila sa mga balay-kalingawan ug ubang dapit nga makarelaks sila imbes unta mag-edukar sa ilang kaugalingon aron makapalambo sila sa tagsatagsa nila ka barangay.

Mao niy nakadaot sa ubang brgy. officials kay wala sila magtuman sa tinuod nilang kaakohan. Gipakyas nila ang ilang konstituwente!

* * *

"Naay mga tricycle driver sa Talisay City nga P7 gihapon ang ipaplite bisan naa nay bag-ong taripa nga P6 na lang ang plitehan. Asa mi reklamo ini?" -- 0918-3208415

I-refer ni ninyo ngadto sa Talisay LGU. Ipadangat ang inyong reklamo ngadto sa konsehal nga maoy chairman sa committee on transportation.

Mas maayo kun makuha ninyo ang ngalan sa driver ug body number sa tricycle aron dili lisod ang pag-trace niini.

* * *

(Sumbong ug reklamo? Text sa 0910-8105522).