Ang kultura sa bokasyon ning atong panahon

Sa matag higayon nga saulogon ang Domingo sa Maayong Magbalantay, gigahin usab kining maong dapita sa pagsaulog sa Kalibutanong pag-ampo alang sa bokasyon. Diin ning maong adlaw ang simbahan maghiusa diha sa pag-ampo nga unta dugangan pa, ug himuong mas daghan pa ug mas nahaom sa kasingkasing sa Maayong Magbalantay ang mga magbalantay nga moatiman sa panon sa Dios diha sa iyang Simbahan.

Tinuod nahimong daw komplikado ang atong kinabuhi ning panahon nato karon. Nahimo naman ganing ikaduha na lang usahay ang Dios diha sa mga priyoridad sa mga tawo. Nagkadaghan ang mga tawo karon apan nagkanihit ang gidaghanon sa kaparian ug mga relihiyoso nga moalagad kanila. Kay lagi, diyotay ra man ang mopili ning matanga sa pagkinabuhi. “You don’t have to be a priest in order for you to be significant.” Husto man na, apan timan-i dunay buhat ug gahom ang usa ka giordinahan nga wala sa uban. Ikaduha, sanglit tawhanon man ang Simbahan natural masayop. Sa dihang giordinahan ang usa ka tawo wala kini magpasabot nga nawala na pud ang iyang mga pagkahuyang ug pagkamasalaypon mao nga padayon siyang masayop ug naningkamot nga makigbisog sa sayop tungod ug alang sa tinguha nga mabalaan. Kun asa ka dagma adto lang pud bangon. Hinaut unta nga sa atong pagsaulog ning maong Kalibutanong Pag-ampo alang sa Bokasyon, maningkamot kita diha sa pagtabang aron mas molipang pa ang kultura sa bokasyon ning atong Simbahan.