Paglaom sa krisis

Sa pagsu’d palang sa entablado napuno na sa pagbiay-biay sa mga tawo si Susan Boyle, contestant sa sikat nga ‘reality show’ sa Britanya nga ‘Britain’s Got Talent’.   

Dalagang guwang ug walay trabaho ang kuarentay siete anyos nga si Boyle.   Apan boluntaryo siyang mag-aawit sa usa ka katolikong simbahan sa Britanya. Nangatawa pa ang mga tawo sa mga tubag sa tiguwang nga si Boyle sa tulo ka mga hurado. Ang tanan, nagduda sa talent ni Susan tungod kay wa’ sa iyang dagway ang pagka-maayo nga mokanta. Apan   nasayop ang tanan, bisan ang mga hurado tungod sa daw anghel nga gi-awit niini ang ‘I Dreamed a Dream’ gikan sa musicale nga ‘Les Miserables’.   Nangangha ang mga tawo ug ingon sa nauwaw nga sayop sila sa ilang pagtamay kang Susan. Pulos niuyon sa pasundagay ni Susan ang tulo ka mga hurado.

Apan wa’ lang sa maong entablado natapos ang kasikat sa kuarentay siete anyos nga dalagang guwang. Karon, niabot na sa usa ka gatos ka milyon ka higayon nga gitan-aw ang iyang pasundayag nga gibutang sa ‘youtube’. Kini ang nagbukas kang Boyle og daghang kahigayonan lakip na ang iyang ambisyon nga mamahimong usa ka recording artist.   Tungod sa kasikat ni Susan, nahatagan siya’g higayon nga ma-interview sa CNN ug ma-interview sa sikat nga si Oprah. Labaw sa tanan, nahatagan si Boyle nga mahikap ang daghang tawo sa kalibutan pinaagi sa iyang pasundayag. Si Boyle ang bag-ong nawong sa paglaom di’ lang sa mga taga Britanya apan sa mga tawo sa bisan asang bahin sa kalibutan nga su’d sa dugay’ng panahon nagtuo nga wa’ nay maayong ugma nga nagpaabot kanila.

Dinhi sa nasud, di’ matukib ang kalipay ni Carlito Cabuños dihang nakakita na siya human ang walo ka tuig nga pag-antos sa pagkabuta. Usa si Carlito sa libuan ka mga tawo nga naglinya sa lungsod sa Naval, sa lalawigan sa Biliran nga natambalan pinaagi ni Fr. Fernando Suarez. Atol sa maong okasyon, di’ lang ang mga sama ni Carlito ang nahatagan og paglaom apan ang daghang mga tawo nga su’d sa dugay nga katuigan, nagtuong wa’ nay kaayohan ang sakit nga ilang gihambin. Su’d sa kadaghang higayon nga akong nakita sa telebisyon ang paghikap sa mga ‘faith healers’ sa mga tawo nga masakiton unya daling naulian, naglisud ko sa pagtuo ning tanan. Apan sa dihang akong nakita sa duha ka mga mata unsa ka gamhanan ang kahitas-an sa mga tawo nga may sinsirong pagtuo nga maulian sa ilang mga sakit, di’ masukod ang akong kalipay ug di’ matukib ang paglaom nga hatud ini kanako.

Sa hamubo nga pakigsulti nako ni Suarez, gi-angkon niining di’ maihap ang mga sakit nga natambalan sa kahitas-an pinaagi kaniya. Apan sa tanang sakit nga gi-antos sa mga tawo nga iyang nahimamat, adunay sakit nga alang niya lisud nang matambalan. Matod sa batan-ong pari, ang kahigayonan sa pag-usab ug pagbalik sa kahitas-an ang kahigayonan nga gihatag sa tanan. Sagad sa mga tawo nga gitanyagan sa gasa sa pag-usab, nigakos dayon sa maong kahigayonan. Apan ang dakong kasaypanan mao ang pagbalik dayon sa usa ka tawong dautang binuhatan human sa gamay lang nga tentasyon. Matod ni Suarez, daghan na ang nibalik sa kamot sa kahitas-an, apan dali ra sab nga nibalik sa pagkamakasala human lang sa gamay nga tentasyon.

Apan labaw sa pagpanambal nga gihimo sa pari, usa lang ang iyang tumong—ang paghatag og paglaom sa mga tawo nga su’d sa dugay nang katuigan nagtuo nga wa’ nay paglaom nga nagpaabot kanila. Wa’y bayad ang pagpanambal nga nagsugod buntag ug natapos pagkagabii. Apan alang kang Suarez, igo nang bayad nga may mga tawo nga nahatagan og paglaom ug napukaw ang pagtuo pinaagi sa iyang pagpanambal. Matod sa pari, atol ning panahon sa krisis sa ekonomiya, ang labing makalilisang ug makahadlok mao ang krisis sa pagtuo. Matod sa pari, igo nang may mga tawo nga napukaw ang ilang pagsalig sa kahitas-an pinaagi sa mga milagro sa kinabuhi nga moabot nato sa matag adlaw. Apan usahay, nakatutok lang ang atong atensyon sa mga problema nga atong makalimtan nalang ang mga maayong butang nga nahitabo sa atong tagsa-tagsa ka kinabuhi.

Apan sa matag adlaw may mga butang nakapapas sa atong paglaom. Nag-una na sa listahan ang padayong pagduso sa kongreso nga usbon ang konstitusyon. Sa maka-usa pa, wa’ ta mahibawo ug di’ ‘ta kombensido unsay tinud-anay nga tumong sa mga kongresista nga usbon ang batakang balaod ning panahon nga duda ang katawhan nga gituyo ni aron lang malugwayan sa iyang katungdanan si Presidente Arroyo.   Kun limpyo palang ang konsensya sa mga kongresista nga nagpakabayani sa pagduso sa maong kausaban nganong di’ man sila makapaabot sa sunod tuig dihang molingkod na ang bag-ong administrasyon? Makaduda lang kun may paglaom pa bang nagpaabot nga mag-usab ning mga politiko nga hangtud karon wa’y laing gitan-aw kundi ang ilang kaugalingon.  

Nahulga ‘sab ang paglaom sa mga kababayen-an nga biktima sa pagpanastamas dihang gibakwi ni ‘Nicole’ ang iyang pahayag nga gilugos siya sa Amerikanhong sundawo nga si Daniel Smith.

Ang pagka-abswelto ni Smith sa kaso maoy nagpapas sa paglaom sa mga kababayen-an nga wa’y imposible sa hustisya sa nasud tungod kay bisan ang anak sa labing gamhanang nasud sa kalibutan nasilotan sa usa ka kabus nga nasud.   Apan luyo sa mga pagduda nga may paglaom nga nagpaabot atol ning panahon sa krisis, ayaw sipyata ang pagtan-aw sa palibot tungod kay dakong buhi ang paglaom sa kinabuhi sa mga ordinaryong tawo.