Ang naggamit sa cell. no. 0919-7002911 mi-text nako niadtong Hunyo 21, 2008 (Sent: 07:59:07pm) aron pagpadangat sa kasayoran nga baga (kuno) kaayo ang drugas diha sa Toledo City.
Partikular nga gitumbok sa atong texter mao ang dapit nga duol sa usa ka beach resort. Sumala sa atong texter, polis ang protector sa maong kalihokan maong lisod kining sumpoon.
"Lisod pang panahon, buang pang mga batan-on sa drugs," nagkanayon ang atong texter nga mipadayag sa iyang sentimento.
* * *
Lisod gyod nga sumpoon ang kalihokan sa pagpayuhot sa illegal nga drugas diha sa Toledo kun tinuod nga may polis nga nagprotehir sa maong kalihokan. Pagkatulibagbag niining paminawon!
Buyno, awhagon nato ang kadagkoan sa Toledo PNP sa pag-counter check niining gisumbong sa atong texter. Kun tinuod nga dunay police nga nalambigit sa kalihokan sa drugas diha sa maong dapit, angay siyang ilhon ug pahamtangan sa tukmang disiplina.
* * *
"Good AM. Concern lang ko bahin sa akong friend. Nag-work siya sa pharmacy nga NSH (inisyal). Ang iyang salary kay P50 ra ang adlaw. Then 12 hours ang iyang duty. Wala pa gyod silay day off. If naay holiday mo-duty sila pero walay double pay. Delay pa gyod kanunay ang paghatag sa suweldo. Dugay na kaayo diha ang akong friend pero walay umento iyang suweldo." -- 0906-6142463.
Sa akong tan-aw daghan kaayo’g kalapasan sa balaod nga nahimo ang employer sa higala sa atong texter.
Ang angay buhaton sa maong trabahante mao ang pagdangop sa Labor ug mopasaka siya’g reklamo batok sa iyang employer.
Ang unang reklamo nga angay niyang isang-at mao ang underpayment of wages. Dayon isunod niya ang non-payment of overtime ug holiday pay. Dakog purohan nga hatagan kinig merito sa labor arbiter.
Karong panahona dili maayo nga magpadaugdaog lang kita sa tikasang mga employer. Duna man gyoy ahensiya sa atong kagamhanan nga maoy gitahasan paghikutar sa mga suliran nga may kalabotan sa panarbaho, pwes, modangop kita kanila.
Sa ingon, ato sab nga masuta kun unsa kaseryoso ang kagamhanan pagpanalipod sa katungod sa mga mamumuo.
(Sumbong ug reklamo? Text sa 0910-8105522).