Dili mosukli og .25c

Usa ka nagpailang Larry nga taga Mandaue City mi-text nako ginamit ang cellphone number 0927-3154965 aron pagpadangat sa kasayoran nga adunay botika nga may sanga diha sa may MEPZ 2 nga ang mga sales-clerk dili magtinarong sa paghatag og sukli ngadto sa ilang mga customer.

Gihatag sa atong texter ang kompletong ngalan sa maong pharmacy apan mihukom kong dili kini ibutyag in fairness ngadto sa tag-iya ug tagdumala niini. Nagtuo man god ko nga walay kalabotan ang tag-iya o tagdumala sa maong botika sa binuhatan sa pipila nila ka trabahante.

Ilado ang ngalan sa maong tindahan sanglit daghan na kinig sangang botika sa hapit tibuok kapupud-an. Aron paghatag ninyog ideya, ang ngalan sa maong pharmacy ngalan sab sa usa ka buwak. Sumala sa atong texter, ang branch niini dihang dapita sa may Mepz 2 dili magtarong og sukli ang mga salesclerk labina gyud kun .25 cents lang ang suklion.

"Di na gyod ka suklian labinag .25 cents ra," nagkanayon ang atong texter. "Kadaghan na ko makapalit diha, di gyod tarongon. Kun pangayoan nimo og sukli, balihon na hinuon kag pangayo og coins. Manghinaot ko nga maaksiyonan ni sa management. I'm sure dili lang ako ang nakasinati og susama ini nga problema."

Makaingon tingali mo nga gamay ra kaayo ang .25 cents nga gidaginot og reklamo sa atong texter. Pero kun tukion pag-ayo, dako na og bili ang 25 sentabos. Kon mopalit tas tindahan, dili man ta makapalit kon kuwang og 25 sentabos ang atong kuwarta. Maong dili sab angay tinkyuhon (thank you) sa mga tindahan ang 25 sentabos nga ilang suklionon kanato.

Labot pa, ang 25 sentabos nga suklionon nga dili nila ihatag ngadto sa kustomer makadugang na sa kadako sa ilang ginansiya. Bisan 50 lang ka kustomer ang dili nila suklian og 25 sentabos, kuwarta na kana kun matigom. Busa angay ug matarong lang nga mohatag ang mga tindahan sa saktong sukli. Bisan unsa ka gamay sa kantidad sa kuwarta, modako na kana kun makatigom og daghan.

* * *

 (Sumbong ug reklamo? Text sa 0910-8105522).