Manghingi

Kining badlongon nga mga polis maoy magduhig og buling sa imahe sa organisasyon sa PNP. Maong dili ta makabasol kun dunay mga tawo nga mawad-an og pagsalig sa kapolisan. Naangin lang intawon ang mga polis nga tarong sa binuhatan sa pipila nila ka kauban nga nagpabadlong.

Gihisgotan ko kini kay nakadawat ko’g text nga nagkanayon: "Diha sa Manalili, dapit sa Carbon, kun gabii na gani ug naay mo-parking diha nga sakyanan, moduol sa driver kanang mga police ug manghingi og kuwarta. Kun dili mohatag ang driver, abogon siya sa police. Usahay hulgaon sila nga isyuhan og T.O.P. Mapugos na lang og hatag ang driver kay abogon man o ma-T.O.P." -- 0929-8926260 (Sent: 07:15:08am--June 28, 2008).

Kun ang maong mga polis nangolekta og kuwarta pero wala moisyu og citation ticket o ba kaha resibo ngadto sa driver, morag kuwestiyonable kanang ilang kalaki.

Angayan nga i-counter check sa kadagkoan sa kapolisan kining gibuhat sa mga polis diha sa may Manalili, dapit sa Carbon, nga gireklamo sa atong texter. Mas maayong himoan kinig pakisusi sa immediate superior sa maong mga polis.

Awhagon sab nako ang atong reklamante sa pagpadangat og sumbong ngadto sa PNP Anti-Kotong Text Hotline nga 0927-5151515.

* * *

Duna na say laing estilo sa text scam karon. Mopadala gihapon og congratulatory messages ang mga badlongon sa katilingban nga naghimo niini. Ang nakangilngig ning mga tawhana kay sa gihimo nilang name-dropping, mao pa gyu’y gipili nilang gamiton ang ngalan ni Presidente Gloria Macapagal Arroyo!

Kahilas ning mga tawhana! Wala uroy manglimbawot ang ilang mga balhibo sa paggamit nila sa ngalan sa Presidente sa ilang modus operandi! Dakong tinonto ning ilang gihimo ug dili angay tuohan nga may kalabotan si PGMA ning ilang binuang nga kalaki.

Usa sa naghimo niini mao ang naggamit sa cell. no. 0921-9951793. Ang iyang text nag-ingon: "D'Auditors of PGMA inform you that your C.P.# won P950,000.000 2nd prize winner drawn last June 27-08/DTI-NCR Permit # 2136/ for more info call now! -- Atty. RGR." -- (Sent: 10:28:35 am--June 28, 2008)

Ayaw mo’g to o kun makadawat mo’g text nga ingon niini. Kay kun tinuod pa nga nagpaluyo niini si PGMA, dili ipaagi sa cellphone number ang pagpahibalo kun dili pinaagi sa usa ka designated number.

 (Sumbong ug reklamo? Text sa 0910-8105522).