Kaniadtong Abril 2 ning tuiga gipakanaug na sa pinakataas nga hukmanan ang iyang hukom nga nagpitol sa mangtas, abusado ug magokdanon nga lokal nga kagamhanan sa dakbayan ug lalawigan sa Isabela. Ang kaso may kalambigitan sa pagdumili sa lokal nga kagamhanan sa Cauayan, Isabela (nga giharian sa mga Dy) sa paghatag og business permit sa estasyonang Bombo Radyo Cauayan, Isabela tungod sa pagbulgar niini sa tinonto nga gihimo sa mga Dy atol sa 2001 nga bugnong lugaynon. Ang nahisgutang estasyonan sa radyo hingpit na gayod nga nawagtang sa kahanginan sa dihang gipasirad-an sa mga Dy ang operasyon niini human giparot ni Grace Padaca, kanhi assistant station manager sa Bombo Radyo Cauayan si Faustino Dy Jr. ang kasamtangang gobernador sa Isabela sa miaging 2004 nga bugnong lugaynon.
Matud pa ni Justice Tinga nga maoy nagsuwat sa hukom sa korte suprema nga sa mga panahon nga gamiton na sa kagamhanan ang iyang gahom sa pagsira sa mga pribadong broadcast station dili puydeng ma-minimize niini ang kagawasan sa pagpadayag bisan pa man sa unsang legal nga rason nga gihuptan niini sa pagpasira.
Kining maong hukom kabahin na usab kini sa panid sa libro sa balaud nga nanalipod sa atong kagawasan sa pagpadayag.
Sa mga politiko nga pariha og taras sa mga Dy sa lalawigan sa Isabela, kining maong hukom sa korte suprema mahimo unta kining salamin sa inyong kaugalingon nga mohatag og dan-ag sa inyong mga hukom.
* * *
Pastilang luoya ni Chief Superintendent Federico Terte niadtong miaging Miyerkules sa dihang mipahigayon siya ug ang mga kaubanan og kinalit nga inspeksiyon sa mga bus terminals ug mga pantalan dinhi sa Sugbo. Siya ug ang iyang mga kaubanan hinuon ang nakalitan sa dihang wa sila pasudla sa guwardiya sa Pier 4 bisan pa sa ilang pagpaila ug sa unipormi nga ilang gisul-ob. Si Chief Superintendent Federico Terte mao ang atong kasamtangang direktor sa kapulisan dinhi sa rehiyon 7.
Porbidang ngilngiga diay ning guwardiya diha sa pier 4 bisan heneral di pasudlon. Ngano kaha?