Pagkabanhaw ni Kristo

Alang sa mga milyones ka mga Kristohanon sa kalibotan, ilabina niadtong mga Romano Katoliko, adlaw karon sa pagmaya. Kini tungod kay ilang gisaulog karon ang pagkabanhaw ni Kristo Jesus gikan sa kamatayon.

Pagsaulog sa Easter Sunday karon, daghan ang moadto sa mga beach ug ubang lugar kalingawan isip pagmaya sa pagkabanhaw sa atong Manunubos.

Hinuon ang pagkabanhaw ni Kristo Jesus dili lamang angay nato nga isentro sa pagmaya. Ato usab nga igahin ang maong adlaw pag-usisa sa atong kaugalingon kun angayan ba kita nga pakamatyan ni Kristo Jesus.

Ato usab kunong timbang-timbangon pag-ayo kun angay ba usab kita nga makabaton sa kinabuhing dayon gumikan sa dugo nga giula sa kalbaryo sa krus sa atong Manunubos.

Nagpakamatay si Jesus dili tungod kay gusto kitang iyang luwason gikan sa sala. Nagpakamatay siya gumikan kay gusto niya nga makabaton kita og kinabuhing walay katapusan.

Tungod niini, ang iyang dugo nga giula sa krus dili gayud garantiya sa atong kaluwasan kun dili nato ihukas ang atong dautang kinaiya ug mohangop sa tinarong nga pagkinabuhi.

Ang atong kaluwasan nagdepende ra usab sa atong binuhatan. Walay laing makaangkon niini kun dili kita maghinulsol sa atong mga sala ug mobalik ngadto sa sabakan sa Ginoo.

Hinuon ang pagpakamatay sa atong Manluluwas usa ka dakong tsansa alang kanatong makasasala pagbag-o sa atong kaugalingon aron kita makabaton sa kinabuhing dayon. Giula niya ang iyang dugo aron kita mahibalo nga tungod kaniya aduna kitay tsansa sa kaluwasan.

Kun dili kita magbag-o sa atong kaugalingon, nan walay lugar ang langit alang kanato. Apan kun dawaton nato si Kristo Jesus sa atong kinabuhi ug atong sundon ang iyang pagkamatarong, nan dili layo alang kanato ang kaluwasan nga gitagana sa kahitas-an.   

Dili nato ikalimod nga kita dinhi sa kalibotan tawhanon lamang ug grabe ang atong pagkagumon sa kasal-anan. Dili usab nato ikalimod nga ang atong mga sala maoy bunga sa atong pagkaulipon sa yawan-ong binuhatan.

Atong gipili ang pagpakasala gumikan kay mas gipalabi nato ang mga yawan-on nga binuhatan. Kini ang hinungdan ngano nga gipadala sa Ginoo ang iyang bugtong Anak aron pagluwas kanato.

Usahay makaingon usab kita nga pagkawala gayu’y suwerte ning kalibotana tungod kay dinhi gilabay ang yawa ug ang mga alipores human sa ilang pagsulay ug paglangkat sa trono sa Ginoo. Kay kun adto pa lamang unta sa laing planeta nahulog ang yawa, siguro puro mga balaan kitang mga lumolupyo niining kalibotana.

Apan suwerte usab kita dinhi sa kalibotan tungod kay wala kita pasagdi sa kahitas-an. Tungod kay espesyal kita nga mga nilalang sa Ginoo, dili Siya makatugot nga pabilin kitang maglunang sa pagpakasala.

Kini usab ang hinungdan ngano nga gipadala Niya ang Iyang bugtong Anak nganhi sa kalibotan. Si Kristo mianhi sa kalibotan aron pagpahimangno kanato sa atong mga sala.

Tungod sa dako niyang gugma kanato, iyang giula ang iyang dugo aron kita makabaton og kaluwasan. Apan makabaton lamang kita niini pinaagi sa paghinulsol ug pagduol ngadto sa kahitas-an.

Atong isentro ang atong pangaliya ngadto sa labaw nga makagagahom. Ilabina nga karong adlawa usa ka espesyal alang sa milyones ka mga Romano Katoliko sa tibuok kalibotan.  

Apan hinaut nga dili lamang matag Easter Sunday makahinumdom kita sa dakong gugma nga gihatag sa kahitas-an kanato. Himuon nato nga kada adlaw ang atong pag-ampo ug pagpaduol kaniya aron makabaton kita sa kinabuhing dayon.

* * *

Email: [email protected]