Bililhon ka higala

Daghan kita og mga kaigsoonang kabos nga ubos kaayo og pagtan-aw sa ilang kaugalingon. Gani, adunay pipila nga miisip sa ilang kaugalingon nga sama sa usa ka baho ug malang-og nga basura. Alang kanila gipakatawo sila aron lang sakiton, mobakho ug modanguyngoy. Alang kanila nasilag kanila ang kalibotan ug gitalikdan sila sa Diyos.

Apan, dili ka ubos higala alang sa mga mata sa Diyos ang imong ka bililhon ikatandi sa kinabuhi sa mga kongresista, senador, prinsipe ug mga hari. Usa ikaw ka obra maestra sa Diyos higala sa dihang iya kang gipakatawo dinhi sa kalibotan.

Gihatagan ka sa Diyos og kaalam nga labaw sa tanang mananap. Gani, giila ka man nga hari sa ilang gingharian. Tataw ug klaro kaayo nga ang Diyos mihatag gayod og dakong katungdanan sa tawo sa pagdumala sa kalibotan. Mibatbat ang Genesis 1:26 "And God said, Let us make man in our own image, after our likeness: and let them have dominion over the fish of the sea, and over the fowl of the air, and over the cattle, and over all the earth and over every creeping thing that creepeth upon the earth." Gani, ang tawo gilalang sa Ginoo nga ubos lang og gamay sa anghel. Naghatag siya og igong kaalam nga makadumala sa kalibotan. Ang tawo nagsige na og balikbalik sa buwan. Ug daghan na siya og namugna'g mga kahimanan nga nakapakurat sa atong mga katigulangan. Sama sa ayroplano, telepono, computer, cellphone ug uban pa. Kining tanang panghitabo karon naghatag og katumanan mahitungod sa mga panagna sa Balaang Kasulatan nga ''in the last days the knowledge of man will increase."

Ingon ka niana ka gamhanan, higala. Busa, ayaw tamaya ang imong kaugalingon kun usa ka lang ka kargador, janitor, basurero, katabang, labandera, drayber o security guard. Hibaw-i nga gimahal ka pag-ayo sa Ginoo.

Ang mga kabos mas duol sa dughan sa Ginoo kay sa mga bahandianon. Kay ang mga kabos kanunay mang magsangpit sa ngalan sa Diyos gumikan sa ilang kalisod. Samtang sa laing bahin, daghan sa mga bahandianon ang di na mahinumdum sa Diyos gumikan sa kadaghan sa ilang kuwarta. Saligi lang ang mga pulong sa Diyos, higala nga dili gayod siya motalikod kanimo. Basta kinasingkasing ka lang nga modangop kaniya. Kay kasaligan ang iyang mga pulong. Nagkanayon ang Psalms 12:6 "The words of the Lord are pure words as silver tried in a furnace of earth purified seven times."