Sentimento sa pasahero

Makasimpatiya ta sa usa ka buotan nga drayber pero may higayon nga makasaway sab ta sa ubang mga driver og pangpublikong sakyanan nga dili magtinarong ug mopatigbabaw sa ilang kabadlongon.

Wala ko mag-inusara ning maong baroganan. Ang naggamit sa cell. no. 0919-4693854 mipadayag dinhi sa atong lindog sa iyang sentimento ngadto sa mga driver sa pangpublikong sakyanan isip usa ka pasahero.

Ang iyang text nagkanayon: "Good day, Sir. Makalagot ning ubang mga driver, dah. Kusog magyawyaw kun kitay makuwangan og 50 cents nga iplite nila. Pero kun plitehan nato og P7.00 kay wa tay 50 cents di ta suklian. Limot-limotan lang. Paita god ana. Luoy kaayo ming mga estudyante. Sa uban gani nga place ang P6.50 nga minimum P5.00 lang ang ipaplite sa mga estudyante ug senior citizens. Wa man untay kaso kun di sila mo-consider. Suklian lang unta tag sakto kay bisan tuod 50 cents ra na dako na kaayo na kun tigomon." -- (Sent: 12:10:00 pm--June 15, 2008)

Dako kong uyon sa sentimento sa atong texter!

* * *

"Good PM, Sir. Naunsa na man ning dalan Plaridel ug Manalili sa may Carbon area. Wala man god mabadlong ning mga kawatan ug isnatser nga nia ning mga lugara. Hain na man ang mga polis?" -- 0920-7300675 (Sent: 10:32:58 pm--June 15, 2008)

Angay tingaling hatagan og mas seryosong konsiderasyon sa kapolisan kining sentimento sa atong texter. Kun posible ang pagbutang og police visibility ang nahisgotang mga lugar, mas maayo.

Labing maayo nga ang polis nga ibutang dihang lugara dili tapolan. Kanang kugihang maniid. Duna man goy ubang mga polis nga dili magpainit. Kusog kaayong manilong sa dagkong mga haligi sa mga edipisyo ug sa mga aseras. Nawala ang ilang visibility.

Mas maayo man god nga visible ang mga polis kay sa magtago sila. Dili nato paaboton nga makahuygo na sa pagpamiktima ang mga kawatan ug isnatser ayha pa nato sila dakpa. Mas maayo nga dili gyod nato hatagan og higayon ang mga badlongon nga makapasalir sa ilang tinonto.

Dako ning hagit sa atong kapolisan! Labing maayo nga palamboon nila ang ilang sistema sa pagbantay batok sa mga badlongon sa katilingban. Ug mabutangan nilag polis ang mga dalan Plaridel ug Manalili.

(Sumbong ug reklamo? Text sa 0910-8105522).