Bahin ni Gwen

Samtang nagpadayon ang tigom sa Cebu Citizens Press Council (CCPC) sa Marcelo Fernan Press Center gahapon sa hapon, gitawgan kong Gobernador Gwen Garcia aron pagpadayag sa iyang bahin sa akong lindog gahapon sa posibleng panag-atbang nilang Bise Mayor Michael Rama ug sa iyang manghod nga si GSIS President ug General Manager Winston Garcia pagka mayor sa Dakbayan sa Sugbo sa piniliay sunod tuig.

Matod ni Garcia di na mobalik sa politika si Winston. Gikutlo niya si Winston nga nagkanayon nga tungod sa iyang kasinatian sa GSIS giisip nang iyang kaugalingon nga “technocrat.” Wa hinuon maghisgot ang gobernador unsay himuon sa iyang manghod kun mawa na si Presidente Arroyo sa Malakanyang.

* * *

Nagdumili si Garcia pagtino kun aktibo ba silang manginlabot sa piniliay sa dakbayan. Igo lang siyang niingon nga naluoy siya sa mga molupyo sa dakbayan kay wa sila’y tarung nga kapilian. Giuyonan niya ang mga paniid nga nahawongan ang ubang mga lider sa dakbayan tungod sa ka-dominante ni Mayor Tomas Osmeña.

Matod ni Garcia mas maayo ang kahimtang sa lalawigan kay nagkahiusa nang hapit tanang lider sa politika ug nagpadayon nga labing malambuon sa nasud. Samtang ang dakbayan padayong nalubong sa makalilisang nga utang sa SRP. Akong hubad sa mga gisulti ug wa isulti ni Garcia mao nga gitahan na nila ang kahigayonan pag-ilog sa City Hall sunod tuig.

* * *

Gisubli pagtataw ni Garcia nga magpasubli siya pagka gobernador alang sa ikatulo ug kataposang termino. Nipasalig siya nga way laraw ang ilang pamilya sa paghupot pag dugang katungdanan sa kagamhanan. Matud niya mas molig-on ang Sugbo kun ilang paluyohan ang ubang mga lider nga susama nila’g panglantaw.

Niangkon hinuon si Garcia nga duna siya’y mga igsuon nga sukwahi ang panglantaw. Nga mahimong di motuo sa iyang awhag nga di sila managan. Kinsa may iyang gipasabot nilang Byron, Nelson ug Marlon? Apil ba sab sa gibugnaw ang iyang anak, si Christina, nga gikatahong modagan pagka mayor sa Liloan?

* * *

Gikataw-an ni Garcia ang mga huhungihong nga iyang umaabot nga umagad nga si Mayor Duke Frasco ang modagan pagka bise gobernador sunod tuig. Matud niya, sukwahi sa mga intriga, nagpabilin nga maayo ang ilang relasyon ni Bise Gobernador Greg Sanchez. Bisan pa sa giingong pagpanluod ni Sanchez sa pag-ungot sa gisugyot nga tans-axial expressway.

Gipasabot sab ni Garcia nga way sukaranan ang Pamilyang Durano nga mahudlat sa nagkadako niyang influencia sa ikalimang distrito. Gisubli pagpasalig nga di nila hakpon ang tanang katungdanan basta mapatuman lang ang iyang mga programa sa lalawigan. Wa magtuo si Garcia nga makig-atbang si Tourism Secretary Ace Durano niya. Matud niya daghan ug dagko’g nahimo si Ace sa turismo ug mas maayong padayunon niya pagpalambo ang industriya.

Email:[email protected]