Ang mga krimen

May nag-ingon nga ang pagsaka sa crime rate dili gayod kalikayan sa usa ka dapit nga malamboon ug nagpadayon pa sa paglambo.

Aduna say nag-ingon nga ang pagdagsang sa mga kriminal nga naghimog daghang krimen maoy dayag nga hulagway sa kalisod sa katawhan nga namuyo sa usa ka dapit nga nahitaboan sa daghang krimen.

Para nako, managsamang tinuod ang duha ka argumento nga atong gihisgotan, labina sa sistema sa pangagamhanan sa atong nasud.

Sa usa ka paagi o sa lain, kinahanglan gyod nga kun dunay paglambo, ang kinabag-an maoy makasinati sa maong kalamboan, dili kay kadto rang haruhay nang daan ang kahimtang.

Niining paagiha, mokibra ang kriminalidad. Ug mas molambo ang usa ka dapit diin menos ang nahitabong krimen.

* * *

"Good AM. Naa lang koy komentaryo bahin sa smoke test. Sanglit nakahibawo na man ta nga kadaghanan sa mga binabaye nga motorsiklo di na mogawas ang aso nganong pakuhaan pa gihapon og smoke test? Dagdag na lang na sa gasto. Maayo ni wagtangon. Okey ra kun diesel ang imong gigamit kay segurado naay aso kana." -- 0909-4812128

Entitled ka sa imong kaugalingon opinyon, Bay.

Pero para nako, ang tanang motorsiklo angay gyod ipailawom sa smoke test; walay exempted niining maong lagda.

Kinahanglan nga ang tanang motorsiklo moagi gyod sa tukmang procedure sa smoke test. Dili kay komo binabaye ang motor i-exempt na lang sa smoke test. Dili kana makiangayon.

Mosunod lang tas mga lagda aron dili ta mahasol sa umaabot. Nakasabot kong kitang tanan may nagkadaiya ug kaugalingong mga interes. Pero kinahanglang ipatigbabaw ang interes sa balaod.

* * *

Naa lang koy sugyot sa mga tagdumala og mga internet cafe.

Mas maayo unta nga ipatuman sulod sa internet cafe ang kahilom. Aduna man goy ubang mag-internet o magdula og computer games nga labihang langasa. Saba kaayo. Makadisturbo sa ubang nag-internet nga gusto'g kahilom.

(Sumbong ug reklamo? Text sa 0910-8105522).