Sa hawanang sagrado

MARSO 15, 2009:  Ikaduhang Domingo sa kuwaresma

Mga Pagbasa:  Ex 20:1-17/Sal 19:7-14 /Rom 7:13-25/Jn 2:13-22

Kun maghisgut kita og templo sa konteksto sa mga Judio, kini simbolo sa ilang pagka-sila ug mahinungdanon kining bahin sa ilang kinabuhi ingon nga usa ka nasud ug katawhan ni Yaweh. Nan, kay sentro man halos sa tanang kalihukan, mahimo usab kini nga sentro usab sa ekonomikanhong kalihukan.

Ang atong Ginoo, gibati og tumang kapikal tungod sa binuhatan sa mga kadagkoan nga imbis motahud sa kasagrado sa templo, nahimo naman hinuong mitugot nga daw ibaliwala lamang ang kabililhon ug kasagrado sa maong dapit ingon nga dapit sa pag-ampo.

Dugang pa, ang atong Ginoo buot mopalutaw sa linain nga pagsabot sa templo ingon nga iyang lawas. Ang maong templo ingon nga pukanon pinaagi sa kamatayon, ang magmadaugon human sa tulo ka adlaw. Butang nga wala hisabti sa mga tawong naminaw kaniya.

Kita gidapit sulod ning panahon sa kwaresma sa paghimo og usa ka linain nga panaw uban ang mahilomon ug maampoong kahilom kun nitubo ba kita ingon nga lawas mistiko ni Kristo o nagpabilin pa ba kitang kutob lang sa pagsabot sa balay-alampoanan ingon nga bugtong hawanan nga sagrado.