Dili ikalimod nga pwerteng dakua g’yod tinuod sa gimando nga multahan sa mga madakpang drayber. Apan ang akong pangutana, madakpan ba god ang mga drayber kun magtarung lang sa pagmaneho sa ilang sakyanan?
Ang uban moingon nga madakpan kuno gihapon bisan unsaon nila sa pagmatngon. Bitaw, tungod sa kadaghang mga lagda, makahimo ka g’yod og kalapasan, apan mahimong mosabot ra ang enforcer kun dili kaayo grabe ang imong salaud.
Apan kun bisan og nasayod ka nga gidili sa usa ka sakyanan, apil na ang mga motor, nga magdagan-dagan nga walay side mirrors unya ibaliwala ra gihapon nimo, aw dili na tingali maayo nga pasayloon pa ang maong drayber.
Pananglit ang paghunong diha sa eskena nga bahin, nga makamugna og kahasol sa ubang sakyanan kay mababagan man sila, angay ba god nga pasayloon?
Kun ako ang manakop, dili g’yod nako pasayloon kining mga drayber nga kun “green” pa ang signal magpa-aginod sa pagpadagan diha sa eskena aron maabtan og “stop” signal.
Abi ninyo og ngano? Ang mga sakyanan nga nagsunod mahasol kay dili makaagi. Tuyoon man god ninyong mga PUJ drivers nga magpahinay-hinay aron maabtan mo sa stop diha sa eskena aron makapanawag og pasahero.
Kaniadtong miaging adlaw, miadto ko sa Girl Scouts office diha sa Banilad. Ang Archbishop Reyes Avenue (Banilad Highway) dunay “double solid line” tunga sa karsada nga nagsilbi nga “island.”
Sa ato pa, gidili sa mga motorista ang pagtabok direkta sa laing “lane.” Usa ka drayber og sakyanan ang akong gibadlong. Maayo lang hinuon kay mipatoo lang usab.
Kamong mga drayber, ilabi na ang mga PUJ driver, nga nagbiyahean diri sa Lahug, pasigaha g’yod ang inyong mga headlights sa gabii samtang magdagan aron dili makabayad og daku nga multa.
Awhagon nako ang mga LTO agents ug sakop sa PNP Traffic Group nga hugtan nato sa paghimo og kampanya kining mga drayber nga dili magpasiga og suga panahon sa gabii.
Unya, kamong mga pasahero, simpatiya kamo sa mga traffic enforcers kay ang among tumong mao ang pagdisiplina sa mga drayber tungod ug alang sa inyong siguridad.
Tabang lang usab hinuon og bantay sa ubang mga mananakop nga usahay matintal sa pagpangwarta. Kun ako’y manakop, anha ra ko moisyu og TOP sa dapit nga dunay makadungog para walay magduda.
Duna man go’y ubang enforcer nga molakaw og layo, unya pasundon ang drayber. Diha lang ang drayber sa iyang lingkoranan, dili na kinahanglang pakanaugon pa.
Ipasabot nako kaninyo nga buotan kaayo ko apan estrikto ko sa mga abusadong drayber, apan labaw na kong estrikto sa mga kurakut nga traffic enforcers.
Nakabantay mo, sunod-sunod kining akong information campaign aron magtudlo sa mga drayber kay nalooy ko nga daghan na kanila ang nakabayad og dagko nga multa.
Kamong mga “operator” og public utility vehicles, mas labing maayo tingali ninyo nga susihon ninyo matag buntag kun ang inyong mga drayber duna pa ba’y lisensya.
Kini aron malikayan nga ma-impound ang inyong sakyanan nga dad-on sa inyong drayber nga nadakpan na ug naisyuhan og TOP, apan wala lukata lapas sa tulo ka adlaw tungod sa dakung multahan.
Lapas sa tulo ka adlaw, ang mga drayber nga naghupot og TOP maisip na nga walay lisensya.
Sus, moboa ra sa atong lugar uy, wa na tay laing isyu natuki.