Atensyon mga drayber

Sugod niadtong Marso 1, gisugdan sa pagpatuman ang dagko kaayo nga multahan sa mga drayber nga madakpan sa kalapasan sa mga klaro kaayo nga “tinuyo.”

Kini maoy mibanos nga mga reklamo nga akong nadawat niining milabay’ng mga adlaw. Nasabot nako nga gikan kini sa mga drayber o kaha sa ilang mga pamilya.

Dili ko mosakay sa inyong argumento nga sayop kining lakang sa kagamhanan pagpaumento sa multa. Kun ang drayber motuman lang sa mga lagda, makuli nga kamo madakpan.

Duna man go’y mipadala nako og “text message” nga kun patas-an na pag-ayo ang multa, wala nay madakpan ang LTO. Mas labing maayo kun mao kana.

Ang tumong god sa LTO mao nga mokolekta kini og buhis gikan sa rehistro ug ubang matang sa revenue, apan ang multa agi lang kini og pagdisiplina aron dili na unta magpakasayop ang mga drayber.

Apan unsaon, daghang drayber ang “magpaugat.” Bisan og nasayod sila nga ang karsada dunay “double solid lines” nga nagpasabot nga dili ka makatabok sa pikas, tuyoon g’yod paglagbas.

Ikaduha, kanang mga “plate stickers” nga gihatag kaninyo sa LTO human kamo nagpa-renew sa inyong rehistro, ipapilit g’yod kana sa inyong plate number aron dili kamo malangan.

Dayon, ayaw kalimot sa pagsul-ob sa imong seat belt. Ang mga nagmaneho og motor, kinahanglang magsapatos, ug ang inyong motor kinahanglang duna’y side mirror – kanang dili gagmay ha?

Kun gagmay gani nga side mirror, madakpan lang gihapon kamo kay maisip man kini nga “invalid size” nga vehicle side mirror. Mi-concentrate ko karon sa “information campaign” niini kay nalooy ko sa mga drayber.

Apan ang kalooy dunay kinutoban, kana kun bisan sa mga pahimangno, dili gihapon motuman ang mga drayber.

Ang ako lang ipasalig kaninyong mga drayber, samtang misuporta ko sa mga sakop sa law enforcement authorities nga manakop sa mga drayber nga makahimo’g kasaypanan, ayaw kataha pagpahibalo nako kun dunay traffic authority nga mangwarta ninyo.

* * *

Kun madakpan gani kamo, unya kay dagko na man kaayo ang multahan karon, ayaw lang g’yod pagbayad og suborno nga makuha ang inyong driver’s license nga walay resibo.

Abi ninyo og ngano? Mahimong makuha tuod nimo ang imong lisensya, apan ang inyong multahan nagpabilin sa LTO records. Kun madakpan kamo sa sunod, madugang gihapon ang maong mga multa.

Dili ikalimod nga lisud na kaayo karon ang panahon, busa kamong mga drayber, ayaw na tawon paghimo og lihok nga kamo madakpan kay ang multa lang gani sa walay side mirror kapin na usa ka sako nga bugas ang kantidad.

Kun ang usa ka drayber og motor, sama sa habal-habal, madakpan nga nagmaneho og motor nga walay side mirror, unya wala pa gayo’y crash helmet, pwerteng dakua na ninyo og mabayran.

Pananglit mo-drive gihapon mo sa inyong motor nga ang TOP nga giisyu kaninyo milapas na sa tulo ka adlaw, nagpasabot nga nagmaneho na kamo og “motor vehicle” nga walay lisensya.

Sa ato pa, mahimo na nga i-impound ang inyong motor ug mosamot na ang problema. Sayon ra kaayo nga dili kita madakpan, tumana lang ang balaud.

Alang niadtong mga nagmaneho og motorsiklo nga “habal-habal” sa lainlaing dapit sa dakbayan, ayaw kalimot nga moabot ra diha sa inyong mga dapit ang joint operation sa kapolisan ug LTO.

Busa, isip inyong higala ug pagtabang kaninyo nga dili madakpan ug dili makamulta, nasayod na kamo og unsay angay’ng buhaton.