Daghan ug lainlain ang estilo sa modus operandi sa mga mangingilad. Maong usahay ulahi na tang makamatngon nga kita nasulod na sa bolsa sa mangingilad. Sa laing pagkasulti, nalingla na kita ug nailad!
Pero kun magbantay lang gyod ta, mamenos-menosan ang kahigayonan nga kita mabiktima sa mga badlongon sa katilingban, partikular na ang mga mangingilad. Kutob sa mahimo, likay sa mangingilad.
* * *
• Kun dunay tawong moduol nimo, pakit-on kag daghang kuwarta sulod sa bag o brief case, motanyag nimog komisyon kun makatabang ka pagtudlo og tindahan nga nagbaligya sa butang nga buot nilang paliton o kaha sakyanan nga kaabangan, unya manghulam nimog kuwarta, ayaw'g kompiyansa. Likayi ang maong tawo kay mangingilad kana (budol-budol).
* * *
• Kun makadawat kag text nga magpahibalo nga ang imong cellphone number nakadaog sa usa ka raffle promo nga wala nimo salmoti, ayaw pahaylo sa dakong kantidad sa kuwarta nga ipatuo sa nag-text nga maoy imong nadaog. Posibleng text scam kana ug ikaw ang mapanguwartahan sa kapulihay.
* * *
• Kun ikaw makadawat og text promo gikan sa 3 o 4-digit numbers gikan sa bisan unsang network provider, ayaw gyod pag-reply aron dili mahurot og kawat ang imong load.
* * *
• Kun may mosungko sa imong panimalay ug magpaila nga empleyado sa usa ka kompaniya nga tigsuplay og tubig, kuryente ug serbisyo sa komunikasyon ug unya mangayo nimo’g kuwarta, ayaw gyod paghatag. Sutaa kun konektado ba gyod siya sa usa ka kompaniya. Tan-awa ang iyang ID ug panawag sa ilang buhatan.
* * *
• Kun adunay mo-solicit nimog donasyon, sutaa kun lehitimo ba ang ilang pagpangolekta. Basahag maayo ang ilang solicitation letter ug tawgi ang ilang buhatan aron pagkompirmar sa tanan aron pagseguro nga dili mahulog sa pribadong bolsa ang imong donasyon.
* * *
• Kun makadawat kag too-good-to-be-true offer nga may kalabotan ang kuwarta, ayaw’g tuo nga "hulog sa langit" kini alang kanimo. Dakog posibilidad nga ilad kini.
* * *
• Ayaw isalig ngadto ni bisan kinsa ang imong ATM card, credit card ug unsa pa diha nga may sulod nga kuwarta aron dili ka mailad.
* * *
(Sumbong ug reklamo? Text sa 0910-8105522).