Smoke belcher

Ang smoke belching vehicles dakog gikatampo sa air pollution. Ug ang kahugaw sa kahanginan makaapekto sa atong panglawas. Busa, angay gyod untang badlongon ang mga sakyanan nga kusog kaayong mobuga og itom nga aso ang mga tambutso.

Usa ka magbabasa ning lindog mi-text nga nagkanayon: "Good day, Sir moreklamo lang ko bahin sa ubang mga sakyanan diri sa Sugbu. Daghan na man ang mga smoke belcher. Usahay ang akong masakyan nga jeep mora gyod og nakabugwak og ata! Unsa nalang diay gamit sa emission testing? Mahal ra ba ning bayad kada rehistro ug ang LTO morag kausa ras usa ka tuig manakop. Kaluoy sa earth." -- 0923-3313857

Balido ug lehitimo ang pagpakabana sa atong texter. Angay gyod untang estriktohon ug hugtan ang kampanya batok sa smoke belching vehicles kay ang aso nga ibuga sa ilang mga tambutso makadaot sa atong palibot, sa kalikopan ug sa kinaiyahan.

Hinaot unta nga aksiyonan kini sa proper authorities. Save the earth!

* * *

"Good day, Sir. Kanang 10H nga jeep, kada sakay nako di gyod na sila mosukli. P8 gihapon ilang kobransa. Hasta ubang mga jeep. Halos tanan. Maayo untag masubay ni sa LTO." -- 0909-6220071

Mas maayo tingaling dili ta maghulat nga aksyonan kini sa LTO. Kun kamo nakasinati nga wala sukliig sakto sa mga PUJ driver, i-report kana ninyo ngadto sa LTO o ba kaha sa LTFRB.

Mas dali ang aksyon kun kamo mismong mga biktima maoy mangunay pagpadangat og reklamo ngadto sa proper authorities.

* * *

"Naay printing company sa Mabolo nga kun magpa-night shift gamay ra kaayo ang suweldo. Ang overtime P5 kada oras. Paspas gyod ang trabaho kay mag-apong ang tag-iya. P170 ra ang adlaw." -- 0907-7669993

Ang buhatan sa DOLE maoy angay ninyong duolon. Usa sa angay ninyong ireklamo mao ang underpayment of wages.

Kun agrabyado gyod mo, labing maayong maghugpong mo aron mas lig-on ang inyong reklamo.

* * *

 (Sumbong ug reklamo? Text sa 0910-8105522).