Alberto's Pizza

Kinsay nag-ingon nga kun lamian nga pizza, mahal gyud, ug lagmit foreign sounding ang origin, sama niining mga nag-unang pizza product dinhi sa atong dakbayan.

Tinuod lamian gyud kaayo, apan mahal lang.

Misuway kog sulod sa usa ka bag-ong pizza house, nangutana ko kun duna ba silay product alang sa mga pobre. Nagkatawa ang diha sa counter, nagtuo siya nga nagkomedya.

Tuod man, gumikan sa ka-mahal, migawas lang ko, kay nganong magpatugatuga man kog kaon og lamian nga pizza nga wa man koy igong kwarta.

Apan, karong bag-o, diha atbang sa V. Sotto Hospital, ang ngalan Alberto’s Pizza nakapahinumdom nako sa gisulti sa pipila ka higala bahin sa local nga pizza, apan lami kaayo, ikatandi sa mga “foreigner” pizza.

Hapon kadto, gamay kaayo ang store, puno sa mga estudyante. Tapus maka-order, diha na lang kos gawas kaon.. Ug tuod man, lami kaayo, barato pa.

Nakaingon kos akong kaugalingon nga mahimo diay ni nato dinhi sa Sugbo. Di kinahanglan nga magsalig ta sa mga langyaw'ng know-how aron makatilaw tag barato, apan lamian nga pizza.

Sa death anniversary ni Msgr. Tosing, February 16, nagdala kog duha ka karton sa Alberto’s Pizza, alang sa mga sakop lang sa banay, nanambong sa Misa. Gikuninitan sa mga bata, hapit kaming mga dagku wala kakaon … ug napugos kamig order laing lima ka karton sa tag P115.00 ang matag karton. Pila ra mi nga nangaon, mikilab lang usab ang lima ka karton.

Unsay sekreto? Naa kono sa dough. Ug puno usab sa toppings. Thin crust ang tanan. Ang pirme nakong daugdaugon mao ang quickmelt cheese, kay pobre man ta: Ang 9” nga American, Beef & mushroom, Chicken garlic, tag-P75 ra ang usa. Samtang ang Alberto’s Full House, tinuod gyud nga full house, anaa ang ham, salami, Hungarian sausage, bacon, pepperoni, chicken hotdog, beef minced, chicken minced, mushroom, pineapple tidbits, black olives, onion, ug red and green bell …P198.00 ra sa quickmelt cheese, samtang tag P249 sa mozzarella cheese, 11”.

This is something nga kitang mga Sugbuanon ma-proud about. Ato ni. Ambut kinsay mga tag-iya ini. To all of them, congratulations. Hinaut nga ma-maintain ninyo ang ka-lami ug ka-barato.