Text scam

Subli natong pahinumdoman ang atong kaigsuonan nga magbantay batok sa text scam. Hangtod gud karon nagpadayon pa gihapon kining maong estilo sa modus operandi. Padad-an ka’g congratulatory message nga (kuno) nakadaog ka’g dako kaayong kantidad pinaagi sa usa ka raffle draw.

Ang congratulatory message sama niining mosunod: “Congrats! Ur Sim now had won P1 million plus N95 Nokia from Pagcor Maagang Pamaskong Handog. To claim call now, Mngr. Ace Javier this number. -- 0928-5612556.” (Sent: 10:11:58am -- November 21, 2008)

Bantayi kining cell. no. nga atong gipatik kay usa kini sa nagpasiugda og text scam– ang 0928-5612556.

Dili mo angay motuo kun makadawat mo’g text nga ingon niini kay wala kini lig-ong basehanan. Mahulog ra ni’g estorya sa ilawom sa dagat. Usa ka dakong bakak ug pangilad.

* * *

“Good AM, Sir. Kining karsada sa brgy. Apas tumoy gyud dapit sa parkinganan sa mga jeep unahan sa 6st. og gamay puwerteng gubaa ug nanimaho pa gyud nga angso kay ang mga driver sa jeep anha ra mangihi sa daplin. Magpasalipod lang sila sa jeep.” -- 0922-3354047

Angay atimanon ug hatagan og tukmang pagtagad kanang karsadang naguba na diha sa Apas. Hinaot unta nga mahatagan kini’g pagtagad sa mga nahingtungdan.

Mas maayo sab unta nga dili magpataka’g patidlis sa ilang ihi ang mga jeepney driver dihang dapita. Mas maayong matukoran og CR.

* * *

“Naay mangingilad diri dapit sa Redemptorist Church. Daghan na ang nailad niya. Moari na siya Wednesday ug Sunday, panahon nga tingmisa kay daghang tawo. Anha na sila dapit sa usa ka food chain mag-estambay.” -- 0908-999318

Maayo unta kun makabantay ang atong kaigsuonan aron dili sila mabiktima ning maong mangingilad.

Kun mahasuroy mo dapit sa Redemptorist, pagbantay gyud mo aron dili mo mailad sa badlongon sa katilingban nga nag-operate nianang dapita.

* * *

(Sumbong ug reklamo? Text sa 0910-8105522).