Hinabang alang sa mga OFW

Ang Overseas Workers Welfare Administration dinhi sa Sugbu mipahibawo nga moabot na sa 210 ka mga Overseas Filipino Workers ang niparehistro sa ilang buhatan nga nawagtangan og trabaho didto sa gawas sa nasud.

Sagad nila nagtrabaho sa mga electronics company didto sa Taiwan nga naapektuhan sa kalibutanhong krisis sa ekonomiya.

Ang hepe sa program services sa OWWA nga si May Codilla mitug-an nga ang maong gidaghanon sukad ni niadtong Disyembre hangtud sa Biyernes sa miaging semana.

Ang mga OFWs nga namauli dinhi sa Sugbo human mataktak sa ilang mga trabaho sa gawas sa nasud, matud sa OWWA, duna pay kahigayonan nga makabalik sa gawas isip mga skilled workers.

Kini tungod sa ilang programa nga paghatag og hinabang financial alang sa mga OFW nga gusto nga motungha ug mokuha og mga short-term courses. Gipahibawo ni Codilla nga ang OWWA mohatag og P14,500 matag-usa ka OFW nga gusto nga motungha og mokuha og mga short-term courses sama sa care-giving.

Gawas sa scholarship assistance makahimo sab ang mga nataktak nga mga OFWs sa pagpanghuwam og puhonan gikan sa OWWA aron makasugod og gamay’ng negosyo.

Si Codilla miingon nga makahimo sa pagpanghuwam og P50 mil nga mamahimong bayran sud sa duha ka tuig aron gamiton nga puhonan alang sa negosyo. Ang maong kantidad mamahimong utangon nga wa kinahanglana ang collateral.

Ang gikinahanglan lang buhaton sa mga OFWs mao ang pagtambong sa usa ka seminar ug training aron sila mamahimong andam sa pagsugod sa negosyo.

* * *

Salamat nga ang ubang mga tunghaan misanong sa awhag nga di na ihinayon ang tinguha pagpausbaw sa ilang tuition. Salamat sa mga tagdumala sa Cebu Doctors University nga mibawi sa ilang petition sa Commission on Higher Education alang sa usbaw sa tuition.

Bisan kun dunay usbaw salamat nalang pud sa USJ-R nga miscellaneous fees ray iusbawan ug wa i-apil ang tuition. Apan hinaut makonsensiya ang 22 ka mga unibersidad ug kolehiyo dinhi sa Central Visayas labi pa ang siyam niini nga dia magbasi sa Sugbu.

Usa sa siyam mao ang Asian College of Technology nga gipanag-iya ni Konsehal Rodrigo Bebot Abellanosa. Hinaut ipakita ni Abellanosa nga mas importante alang niya ang pagtabang sa mga kabus isip usa ka opisyal nga nagpapili sa pampublikong buhatan tungod kay gustong moserbisyo ug dili maoy ipatigbabaw ang kaugalingon niyang interest sa negosyo.

Laing angayang makonsensiya mao ang University of San Carlos nga lakip sa siyam ka mga unibersidad nga nangayo og usbaw. Ang USC usa ka tunghaan nga gidumala sa kaparian busa angayang ipakita niini ang pagpakabana sa mga kabus.

Nasayod hinuon kong di mga kabus ang nagtungha sa maong tunghaan apan labaw sa tanan ug importante nga mahimo sa USC mao ang pagsilbing panag-ingnan sa uban.

* * *

[email protected]