Ihimplo sa duha ka unibersidad

Agi og tabang sa nag-ilaid nga kahimtang sa mga ginikanan taliwa sa dakong kalibutanhong krisis sa ekonomiya nga atong nasinati sa pagkakaron, duha ka dagkong mga unibersidad dinhi sa Sugbu ang boluntaryong mipakunhod sa ilang matrikula.

Ang University of Cebu maoy unang misanong sa kalisod sa panahon ug gisundan sa laing dakong unibersidad nga mao ang University of the Visayas. Ang mga tagdumala sa maong mga unibersidad nga sila si Atty. Augusto Go sa UC ug ang pamilyang Gullas pinaagi nila ni Sir Dodong Gullas ug ni Kongresista Eddie Gullas nakakita sa panginahanglan sa pagtinabangay karong panahon sa krisis.

Dalaygon kaayo ang lakang sa maong mga tunghaan tungod kay dako kaayo kining tabang sa mga ginikanan labi pa niadtong mga igo-igo ra gyud ang kita. Wa gani ta masayod nga ang uban sa mga ginikanan nga nagpatungha sa ilang mga anak diha sa maong mga unibersidad lakip sa mga nawagtangan intawon sa trabaho tungod kay nanirado ang mga buhatan nga ilang gialagaran.

Ang ehemplo nga gihatag sa UV ug UC maoy angayang sundon sa uban pa nga mga tagdumala og tunghaan dili lang dinhi sa Sugbu kun dili lakip sa tibuok nasud.

Samtang nalipay ko sa gipakitang pagpakabana sa mga tugdumala sa duha ka mga unibersidad ngadto sa mga ginikanan sa ilang mga tinun-an, apan dako sab ang akong kasagmuyo nga ang uban nga mga unibersidad labi pa gyud ang kadtong mga gidumala sa simbahan daw sa wa gyud mokihol.

Angayan gani unta nga ang mga sectarian schools maoy nangulo sa lakang pagtabang sa mga ginikanan sa ilang mga tinun-an tungod kay ang maong mga tunghaan giisip man nila nga ministry sa simbahan.

Hain naman dapita ang ministry niini kun mismong ang mga tunghaan nga gidumala sa simbahan tig-a man og balatian. Kun wa ko masayop ang maong mga tunghaan way buhis nga gibayran sa gobyerno tungod kay gipatuo lagi nga di ni negosyo kun dili ministry sa simbahan.

Pero dugay na nako ning namatikdan nga ang unta ministry sa simbahan mas mahal ug gipangayo nga matrikula kun itandi sa mga unibersidad nga gidumala sa mga pribadong mga tawo ug pamilya.

Hinaut nga sa gihimo sa UV ug UC nadutlan og uwaw ang mga tagdumala sa mga sectarian schools ug ilang sundon ang panag-ingnan sa duha ka mga unibersidad nga boluntaryong mipaminus sa ilang matrikula agi’g tabang sa mga tinun-an ug sa ilang mga ginikanan.

Di pa man tingali magpakilimos ang maong mga tunghaan kun ilang ibanan og dyutay ang ilang ginansiya? Bisan og ila nalang tugbangan ang kantidad nga gipakunhod sa UV ug UC.

Ang pagsabot ug pagtabang gikan sa mga institusyon nga sama sa UV ug UC maoy gikinahanglan sa mga ginikanan sa pagkakaron labi pa nga taliwa sa krisis usa sa mga importanteng butang sama sa pagkaon nga di mahimong isakripisyo mao ang edukasyon.

Kini tungod kay kun luoy ang tawong gutom mas alaut ang tawong way sulod ang utok tungod sa kakuwang og edukasyon.

* * *

[email protected]