Extortionist aksyoni

Gibarugan g’yod ni Mayor Tomas Osmeña sa gipangutana nako mahitungod sa giingong “disadvantageous contract” tali sa dakbayan ug sa Filinvest Land Inc.

Ang giingong mabentahaan sa kontrata mao ang dakbayan sa Sugbu kay kuno gilugwayan sa Joint Venture Selection Committee ang termino sa pagbayad sa Filinvest alang sa 10 ka hektarya.

Sa text message, si Osmeña nga atua pa karon sa Houston, Texas, mirason nga kay wala may laing mitanyag og kontrata, dili nato maingon nga mabentahaan ang dakbayan.

Ako hinuon, gusto g’yod unta nga kadtong tulo ka tuig nga termino sa pagbayad mao na lang g’yod ang idayon. Mas maayo man gani unta nga dili lang data-data ang pagbayad.

Sagdi lang, karong Lunes mohimo man og special session ang konseho aron magtuki sa maong isyu, balitaan ko gihapon kamo sa kalamboan.

* * *

Daan pa g’yod ko, duna na ko’y nadawat nga mga text messages nga nagtug-an nga wala masayop ang nag-report nako nga dunay daghang video karera diha sa barangay Ermita.

Lain kining hagit sa akong higala nga si Koronel Patrocinio Comendador nga iyang lihukon sama sa gihimo niya sa pipila ka video karera diha sa barangay Kamagayan.

Unya, Koronel Comendador mas maayo tingali nga kwestyonon nimo si Senior Inspector Pablo Cabildo kun ngano nga wala man niya masakmit kining maong mga video karera ug moli-moli diha sa Ermita.

Ang Police Station 5 (Carbon police station) anaa mahimutang sa barangay Ermita, apan si Cabildo wala makasakmit sa mga video karera, dili ba makauuwaw?

Kadtong mga mipadala nako og text message nga mipadayag og kabalaka nga kamo mahibaw-an nga maoy informer, ayaw kabalaka.

Dili mabulgar ang inyong “identity.” Sama sa usa ka informer nako sa barangay Inayawan nga nabalaka kay gibutyag kuno nako kun unsay iyang trabaho, basin kuno og siya mailhan.

Gipasaligan ko ni Koronel Comendador nga himoan dayon og aksyon ang mga reklamo nga akong mapadangat kaniya. Aron madali, ibutang sa inyong report kun kinsa ang tag-iya sa balay nga gibutangan.

Ang impormasyon, ipadala sa 0917-383-6645.

* * *

Gipasalig sa Task Force Alpha sa Land Transportation Office-7 nga tumanon nila ang awhag ni acting Mayor Michael Rama kun sila mopahigayon og operation dinhi sa dakbayan.

Walay problema matud pa ni TFA president Sir Michael Simtoco. Apil sila si TFA directors Joe Mendaros ug Harvey Osmeña midason nga angay’ng sundon ang awhag sa acting mayor.

Ang awhag nga kun ang mga sakop sa task force maghimo og operation, anha kini himoa sa hayag nga lugar panahon sa gabii unya magbutang og reflectorized sign board nga magpahibawo sa mga drivers sa mao nga operation.

* * *

Nganong wala may gihimo ang kapolisan sa Waterfront Police Station sa mga extortionist diha sa Pier 1 nga mamiktima sa pasahero sa barko?

Gikontak nako si Sir Comendador ug gipasaligan ko nga aksyonan dayon niya ang reklamo sa mga pasahero nga gipaagi sa DYLA, diin anaa usab ko nagtrabaho isip reporter.

Awhagon nako ang mga polis sa Waterfront nga ayaw mo pagtinapolan uy. Inyo na nga katungdanan ang pagpatuman sa city ordinance ilabi na nga nagdawat mo’g allowance sa City Hall.

Isip hepe sa Waterfront police station, lihok tawon diha   Senior Inspector Senor. Ang pag-order ra g’yod ang kuwang nimo ngadto sa imong mga sakop.