Dili na bag-o

Dili na angay ikahibulong ang pamahayag ni Kongresista Antonio Cuenco nga adunay lima ka piskal sa Sugbo nga magdawatan og suborno gikan sa sindikato sa drugas.

Nakadungog na kita og susamang report kaniadto nga adunay mga piskal nga manawat og “drug money” bugti sa dismissal sa kaso.

Gani, mismo si Mayor Tomas Osmeña nag-alboroto tungod sa report nga adunay mga “drug cases” nga dili mosaler kun maabot sa Cebu City Prosecutors Office tungod sa presensiya sa mga piskal nga magpadala sa suborno sa mga drug lord.

Nahanaw ug nahilom ang taho kaniadto. Si Tomas nahilom usab sa iyang kanunay’ng pagpangasaba sa mga piskal, hangtod nga mibalik kini tungod sa gitug-an ni Cuenco niadtong Domingo nga aduna gyuy lima ka piskal nga nalambigit sa korupsiyon pagdawat og kuwarta bugti sa pagbasura sa mga kaso nga atubangon sa mga tigpayuhot og ginadiling drugas.

Angay suportahan ang gisugyot nga imbestigasyon aron mailhan ug makasohan kanang lima ka kagwang nga mga piskal.

Dili na angay palabyon ang kahigayonan karon nga adunay ‘credible’ nga tawo nga mao mismo ang midala sa maong isyu ngadto sa media.

Ang pamahayag sa akong kumpare nga si Dangerous Drugs Board Undersecretary Clarence Paul Oaminal nga ang lista sa mga ngalan sa lima ka mga piskal gisumiter na sa Department of Justice maoy sinugdanan sa tukmang aksiyon aron malimpyohan ang prosecutorial service sa Sugbo batok nianang mga piskal nga nasulod na sa sindikato sa drugas.

Nakaila na kita niining maong mga piskal, apan dili nato angay hinganlan dinhi tungod lagi kay wala pa masugdi ang imbestigasyon.

Mag-ampo lang kita nga walay whitewash nga mahitabo kun himuon sa DOJ ang imbestigasyon. Maayo usab unta og ang DDB, pinaagi ni Usec. Oaminal, makahipos og mga ebidensiya batok nianang lima ka ngalan sa mga piskal nga gisumiter sa DOJ.

Ang pagbutyag ni Cuenco mahitungod nianang lima ka piskal ug ang pagsumiter ni Oaminal sa ilang mga ngalan ngadto sa DOJ usa ka bayanihong buhat.

Angay puohon sa serbisyo kanang klase nga mga piskal nga nakig-abin sa panulay nga maoy nakaguba (ug moguba pa) sa kaugmaon sa atong kabataan.

Sa ako nang giingon, sinugdanan kanang gihimo nilang Cuenco ug Oaminal.

Usa usab kini ka paagi aron malimpyohan ang ngalan sa kinatibuk-ang prosecutorial service sa Sugbo.

Sumala sa gibutyag ni Cuenco, lima ka piskal ang nalambigit sa binuang. Busa, luoy kaayo ang daghang mga piskal nga nagtinarong nga wala magpadala sa haylo sa kuwarta ug seryoso sa ilang pagpangalagad isip prosecutor sa mga kasong criminal.

Hala, kamong lima ka piskal nasayod naman kamo nga kamo na ang gi-rombo niining mga higayona, undang na kamo sa inyong pagpanawat og “drug money” ug kun mokatol gyud nang inyong kamot kun dili makakupot og salapi gikan sa drugas, pangundang na lang kamo.

* * *

SAN FERNANDO. Mibukal na og samot ang politika sa lungsod sa San Fernando karon nga nagkinihaay na ang isi’g ka kampo ni Mayor Lakambini “Neneth” Reluya ug Bise Mayor Antonio Canoy.

Sa miaging tuig, ang kampo ni Canoy maoy gipasanginlan nga nagpaluyo sa mga magtutudlo nga mipasaka og kaso ni Reluya tungod sa computer sets nga gidonar unta sa usa ka lumad nga taga San Fernando nga tua na sa Amerika alang sa tunghaan sa Sangat, apan giingong gipanghimulbulan una sa wala pa gihatag sa maong tunghaan.

Sa miaging adlaw, si Reluya na usab ang midangop sa Office of the Ombudsman Visayas ug gipasaka ang kasong graft batok ni Canoy tungod sa pagpamalit og basurahan nga nagkantidad og P8 mil kada usa.

Sa upat lang ka pahina nga complaint sa mayor, matud niya nga si Canoy maoy responsable sa pagpamalit og 100 ka trash bins sa kantidad nga P312,700, apan ang kagamhanang lokal sa San Fernando ubos sa pamunoan ni Canoy mi-appropriate og P800 mil alang sa maong katuyoan.

Ang complaint ni Reluya nagkanayon nga ang price list sa trash bins sa Rodenstock Manufacturing Corp., ang tiggama sa Euro Mobile nga brand sa trash bins nga susamang brand nga gipalit atol sa termino ni Canoy, nagkantidad lamang og P3,127 kada usa. Ang 100 ka basurahan magkantidad lamang unta og P312,700, apan sumala pa ni Reluya nga P800 mil ang gi-release nga salapi sa kagamhanan sa San Fernando hinungdan nga mikantidad ang matag basurahan og P8 mil kada usa.

Dili pa gyud kini mao. Sa P800 mil nga gi-allocate sa lungsod sa San Fernando ug gibayad ngadto sa Cebu 7H Technochem Industries, ang distributor sa mga basurahan, P750 mil lamang ang nadawat. Gipresentar sa mayor ang tseke sa Development Bank of the Philippines (CEB 23432162) nga pinetsahan og Disyembre 19, 2006 ug gipirmahan ni Canoy nga nagkantidad og P750 mil nga maoy gibayad ngadto sa tindahan.

Ang P50 mil wala na ma-account.

Ang maong mga basurahan wala usab kini mapakitang mga dokumento, sama sa minutes sa Bids and Awards Committee nga nagpakita sa posting sa subasta ug pila ka kompaniya ang miapil niini.

Adunay nagsulti nako nga nasulbad na kining maong isyu sa Commission on Audit, pero wala pa kitay nakit-ang dokumento mahitungod niini.

Nagtuo ko nga ang pagbinaslanay og kiha sa kampo sa mga Reluya ug Canoy bunga lamang sa nagka-init nga politika sa San Fernando.

Kini, ilabi na nga sunod tuig mag-eleksiyon na usab.

Posible nga magkaatbang si Reluya ug Canoy sa pagka-mayor sa maong lungsod.

* * *

Inyong reaksiyon ipadala sa 0915-7817491 o [email protected].