Lig-on kayo

"Good AM, Sir. Naay payuhot og shabu diri sa Soong 1, Lapulapu City. Wa man gyod ni dakpa. Naay druglord diri nga lig-on kaayo. Dili kuno na dakpon kay naay daghang kapit sa mga polis ug abogado. Dugay na man ning problemaha diri, "Sir." -- 0928-6167336 (Sent: 12:05:45pm--October 22, 2008)

Kanang pangangkon nga naay "kapit" ang maong "druglord" sa polis ug may abogado pa gani, posibleng patuo-tuo ra na aron ingnong untouchable sila ug walay mangahas pagpanghilabot sa ilang kalihokan.

Hinuon, dili sab nato ika-discount nga posibleng tinuod gyod usab kanang mao nilang pangangkon. Dili man ikalimod nga dunay mga tigpatuman sa balaod nga makigkunsabo na hinuon sa mga gukdonon sa balaod.

Buyno, ato kining ipa-counter check sa kapolisan sa Lapulapu aron masuta kun unsa kini ka tinuod.

Sa samang higayon, manangpit sab ko sa Dangerous Drugs Board. Nakaseguro kong mahatagan og pagtagad ni Atty. Paul Oaminal kining maong sumbong. Seryoso kaayo si Usec. Oaminal sa kampanya batok ginadiling drugas. Nagpakita siyag talagsaong kakugi sa maong kampanya.

* * *

"Sir, naay daghang sugal diri sa lungsod sa Borbon. Tong-it ug uban pa. Wala man magpakabana ang hepe diri sa kapolisan. Naa ang sugal sa may merkado, kilid sa taytayan. Ila lang agi-agian." -- 0926-4681967 (Sent:: 07:25:19pm--October 22, 2008)

Basin walay kasayoran ang kapolisan sa Borbon nga naay nagpasiugdag sugal diha sa merkado dapit sa kilid sa taytayan maong wala kana nila maaksiyoni.

Pero kun tinuod ang pangangkon sa atong texter nga "agi-agian" lang sa mga polis ang nanagsugal, makaingon tang "Kay ngano kaha?"

Ang sugal illegal nga kalihokan. Ang tong-it kalapasan sa Presidential Decree No. 1602 busa angay gyod kanang dakpon.

Buyno, awhagon ta ang kapolisan sa Borbon sa paghimog aksiyon ning gitaho sa atong texter. Mo-reflect baya sa ilang kaligdong sa pagserbisyo sa katawhan ang aksiyon batok niini.

Palihog, pagpakabana. Ug ... aksiyoni!

* * *

 (Sumbong ug reklamo? Text sa 0910-8105522).