Pagbuak sa Guadalupe

Lagmit mahinayon gyud ang pagbuak sa barangay Guadalupe. Matud ni Congressman Tony Cuenco, kun molusot ang iyang balaudnon, mag-plebisito karong Hunyo o Hulyo pagpangutana kun unsay gusto sa mga molupyo sa Guadalupe ug Banawa – siakon ba ang Guadalupe ug himoong laing barangay ang Banawa, o dili ba.

Natural, mo-yes gyud ang taga-Banawa. Ug sa akong pakig-istorya sa pipila ka konsehal sa Guadalupe, mora mag uyon sad sila – kun maoy gusto sa katawhan. Mao usab kini ang baruganan ni Brgy Captain Jingjing Faelnar – ang kabubut-on sa katawhan maoy iyang agdon.

Nabalaka lang si Jingjing nga kun dili maklaro ang boundary unya sa Banawa, ilabina sa side sa Labangon, walay mga dagkung establishment nga mahisakop sa Banawa, ug asa man unya silag dagkung source sa buluhisan? Maoy hunahuna ni Jingjing nga unahon una paghusay ang boundary both sa Guadalupe ug Labangon side, aron nga kini dili mahimong problema unya sa Banawa.

Sa iyang bahin, si Congressman Cuenco confident kaayo nga mudaog da ang “Yes” votes sa plebisito, lakip na sa mga molupyo sa Guadalupe. 

Sa laraw paghimog laing congressional district sa dakbayan, si Congressman Cuenco mi-justify nga sa pagkakaron, mga 80 porsiyento sa mga barangay sa south district, atua mahimutang sa kabukiran, mga mountain barangay, ug tagsa dang maabtan sa mga mehoras sa dakbayan.

Matud ni Congressman Cuenco, ang tanang barangay captain sa maong mga mountain barangay, nalipay kaayo ug dakung uyon nga himoon silang separate congressional district dinhi sa dakbayan sa Sugbo. Ug lagmit anhi na dinhi modagan si Ronald pagka-Congressman. Ug magpili sad unya tag dugang 8 ka city councilors alang ning bag-ong distrito. 

Matud pa usab ni Jingjing, dugay na siyang mi-advocate niini aron kahatagan og full attention, hingpit nga pagtagad ang mga mountain barangay. Ug sa pangutana bahin sa rift nilang Tony, iyang tubag:

“Wa gyud koy nahimong kasal-anan batok ni Congressman Cuenco. Kadtong intriga nga kuno gibiyaan ni Tony ang mga barangay captain sa miaging eleksiyon, ambut kinsay misumbong niini ngadto kang Mayor Osmeña.”

Tuo kong Jingjing niini, dili tungod kay amigo kaayo mi, kondili tungod kay wa siyay rason nga hasta ako iyang bakakan. Ikaw Dro?