Rama - Young tandem sa BOPK

Nagkakita mi si kanhi konsehal Augustus Young sa city hall, ug sa akong pagsona kun modagan ba siya sunod tuig, klaro niyang tubag nga definite kaayo nga modagan siya pagka-bise mayor sa dakbayan sa Sugbu.

Sa ato pa, tungod kay definite man usab kaayo nga modagan pagka-mayor si Acting Mayor Mike Rama, it’s going to be a Rama-Young tandem karong 2010 sa BO-PK. Alegre.

Nagpasabot nga kun mahinayon kini nga tandem, dili diay tinuod ang gihugonhugon nga si Congressman Raul del Mar maoy himuong standard bearer sa BO-PK sa dakbayan sa Sugbu. Ug kun dili mabuak ang partido ni Mayor Osmeña, lig-on ang Rama-Young tandem.

Pagkakaron, wa pay klaro kun kinsa ang mahimo nilang kaatbang. Pulos lang hugon-hugon, mga speculation. Matag karon ug unya, mobutho ang ngalan ni GSIS President Winston Garcia. Ug duna say moingon nga mobalik kuno si kanhi Mayor Alvin Garcia.

Giingon nga kun mag-usa ang mga Garcia nga mao karoy giila nga labing lig-on ug gamhanan sa natad sa politika dinhi sa Sugbu, lagmit ilang maagaw ang dakbayan sa Sugbu gikan sa mga Osmeña, nga sa pagkakaron, wa sad mahiusa. 

Gumikan niining leave of absence ni Mayor Osmeña, ug kun magpabilin siya didto sa Amerika hangtud sa panahon sa eleksiyon, dili na kaayo siya ma-active pagdumala sa partido, ug kinsa man unya ang makahulip ug makapa-intact sa BO-PK?

Makahulip ba si Mike Rama sa matang sa liderato ni Mayor Osmeña pagdumala sa BO-PK? Nga inigkaduol na unya sa eleksiyon, di kaha ni sila magkatibulaag? Sa south district pananglitan, kun dili magkauli ang mga kabubut-on ni Mayor Osmeña ug Representante Tony Cuenco, kinsa man unya ang muatbang sa paluyohan ni Tony pagka-Kongresista sa south district?

Ug matud ni Tony, daghan konong mga barangay captain ang miaghat kaniya nga padaganon si Ronald, iyang anak. Ug sa gusto tag sa dili, gumikan sa performance, hawak ni Congressman Cuenco ang south district. Ato kining namatud-an sa nangaging mga eleksiyon, wa gyud mapukan ang iyang liderato.

Kinsa man unya, ang mahimong kaatbang sa manok ni Tony, si Konsehal Gerry Carillo o si Konsehal Bebot Abellanosa? Si Atan diay?