EDITORYAL - Midagsa ang mga artista

Midagsa ang mga inila ug dili kaayo inila nga mga showbiz personalities dinhi sa Sugbu. Kini dili sa pagyukbo ngadto ni Sr. Sto. Niño kundili sa pagpahigayon og show atol sa kasaulogan sa Fiesta Señor.

Giatol sa kapistahan sa Senyor ang maong show aron maisip nga usa kini ka bahin sa selebrasyon.

OK ra kini. Ang dili OK maong gipatuo sa mga batos ning maong mga artista nga sila nanganhi aron sa paghalad sa ilang kaugalingon kun pagyukbo ngadto ni Sto. Niño.

Kay ang tinuod mao nga nanganhi sila aron sa pagpahigayon og kalingawan alang sa mga namistahay.

Bisan pa niini, atong gihangop ang pag-anhi sa gihisgutang mga artista ug manghinaot kita nga magmabungahon ang ilang pag-anhi atol sa kapistahan sa atong Senyor.