ENERO 11, 2009: Pangilin sa pagbunyag sa Ginoo
Mga Pagbasa: Is. 42:1-4.6-7/Buh. 10:34-38/Mk. 1:7-11
Daghan kanato karong mga tawo ang wala na gyud intawon makatugkad sa tabunok nga implikasyon sa Sakramento sa Bunyag. Paigo na alang kanila ang hikay, ang paganyar ang piktyur piktyur sa mga maniniyot nga moigwad-igwad sa ilang lubot nunot sa ilang mga bisti nga nagtinihik sa tela. Duna pa gyu’y magpabunyag nga mamugos bisan kun sa Pre-Jordan late na. Unsaon na lang ang ilang hikay?
Sa panuigon nga 30 ang atong Ginoo mihimo og usa ka mahinugdanong hukom nga mao ang pagsugod sa iyang publikong misteryo. Ang bunyag mao ang pormal nga pagsugod sa maong hamubo ug kulbahinam nga pagsangyaw ug pagpanudlo.Sa dihang si Jesus nagpabunyag kang Juan, iyang gitimaan nga siya misulod gayud sa tawhanong kinaiya bisan pa man kun hawa sa sala.
Ang bunyag sa atong Ginoo mao pud unta ang magpahinumdom kanato sa atong kaugalingong bunyag nga mipatik kanato sa permanenteng timaan ingon nga iyang mga anak. Kini nagdapit kanato sa pagpuyo sa implikasyon ingon nga mga linalang nga miambit sa pagkapari, pagkahari ug pagkapropeta ni Jesus atong Ginoo.