Gikan sa cellphone number 0906-3516008: "Sir, maayong udto. Naay drug pusher diri sa Lawis, Pasil. Ang iyang ngalan alyas Bakang. Wala gyud ni dakpa sa mga polis kay mohatag man siya’g suborno."
Morag identified na kaayo ning maong drug pusher diha sa Lawis, Pasil kun maoy atong analisahon ang sumbong sa atong texter. Ingon gani sa nakaila na sa maong pusher ang mga tinugyanan sa balaod pero gibale-wala lang nila kini.
Labing maayo tingali nga mohimog pakisusi bahin ning maong sumbong ang barangay opisyal aron pagsuta kun nalambigit ba gayod sa pagpayuhot og drugas ang usa ka Armando alyas Bakang. Mas maayo sab nga i-counter check kini sa kapolisan.
* * *
Ang naggamit sa cellphone number 0918-2208057 mi-text kanako ug mitaho nga ang usa sa nanag-iya og video karera diha sa barangay Ermita mao ang mga personahe nga motubag sa ngalan nga Lary ug Tinay.
Awhagon nako ang mga barangay opisyal sa Ermita sa pagsusi niining maong sumbong aron masuta kun tinuod ba kini o dili.
* * *
"Ako si Belen, nagpuyo sa sitio Anadol, barangay Lagtang. Hangtod karon nagpabilin lang gihapon ang sugal nga karera. Ang nakapait kay di na manarbaho ang maong mga bana kay sige na lang sugal og karera." -- 0910-2150227.
Lehitimo kining reklamo ni Belen. Maayo unta nga aksiyonan kini sa mga barangay opisyal sa Lagtang. Kun maoy atong basehan ang reklamo ni Belen, klaro kaayo nga nakahatag og puwerhisyo ang sugal nga karera sa Lagtang kay nakaapekto na man kini sa panginabuhi sa mga pamilya kay ang mga asawa naproblema na man niini kay dili na man manarbaho ang ilang mga bana. Atong nakita nga angayang badlongon ang nag-operate og karera diha sa Lagtang kay nakahasol na kini sa daghang mga asawa.
Mas nasuheto ang mga barangay opisyal sa Lagtang sa maong dapit busa angay gayod nga silay mohimo og initiative.
* * *
(Sumbong ug reklamo? Text sa 0910-8105522).