Tapos na lang tuig Arnel

Dakung binuang ang lakang nga ibalhin ang pagsaulog sa Rizal Day gikan sa Disyembre 30 ngadto na sa Hunyo 19.

Ang rason sa mga kongresista nga mihimo niining maong sugyot mao nga wala kuno’y klase ang Disyembre 30 ug maayo kuno kun ibalhin kini sa Hunyo 19 kay aron dili g’yod makalimtan sa katawhan.

Gikuyawan ko nga kun anaa pa kining maong mga kongresista basin og wad-on usab nila ang semana santa nga maoy kasaulogan sa pagkamatay sa atong Ginoo.

Ang Disyembre 30 maoy death anniversary ni Dr. Jose Rizal, ang atong nasudnong bayani. Samtang ang Hunyo 19 maoy iyang adlaw’ng natawhan.

Buot sa maong mga kongresista nga usahon na lang ang kasaulogan sa Rizal Day ngadto sa Hunyo 19. Kamo, mosugot ba kamo sa maong sugyot?

Sama ra lagi kini nga ang semana santa wad-on ug ang saulogon mao na lang ang Pasko nga maoy pagkahimugso sa atong Ginoo. Kini maoy yano ra kaayo nga pagsabot sa maong isyu.

Kining maong mga kongresista wala na g’yod tingali’y nahuna-hunaan nga maayong balaudnon, mao nga ang death anniversary na lang ni Rizal ang nahuna-hunaan aron wad-on.

Angay nga dili wad-on ang death anniversary ni Rizal kay magpahinumdom kini sa atong mga batan-on sa mga bayanihong gihimo niya kaniadto.

Kun moingon sila nga saulogon gihapon sa nasud ang pagkamatay ni Rizal apan adto na sa Hunyo 19, dili na lang ko molalis pa apan magpaila sa ilang pagkatawo.

Labing maayo unta kun ang mga opisyal nato sa dakbayan, sama ni Konsehal Arsenio Pacana, mopadangat og hugot nga pagsupak niining tinguha sa maong mga kongresista.

* * *

Usbon nako ang awhag sa kadagkoan sa Department of Engineering and Public Works ug sa ubang opisyal sa dakbayan nga paspasan na nila ang pag-ayo sa mga gubaong karsada.

Karon nga may makuhaan na sila og dugang gahin pagpamalit og aspalto, hala ayoha dayon ninyo ang mga karsada nga maoy sagad agian og mga sakyanan.

Ang kwarta god nga alang unta sa calamity budget, kay wala man mahurot og gasto, mao kini ang gamiton sa pag-ayo sa mga gubaong karsada ug sa mga ponder nga suga sa poste.

Usa sa mga gubaong karsada mao ang Sikatuna ug Echavez nga anha mag-agian ang mga PUJ nga magpanawan sa Talamban.

Pwerteng batia sa maong karsada uy. Unya, kun mamaayo na kining maong karsada, awhagon nato ang MCWD nga tarungon ninyo ang inyong project.

Awhagon nako si Konsehal Nestor Archival nga maoy maniid kun maglungag na ang MCWD sa karsada kay ang ilang himoon mao ra g’yod ang pagguba sa atong kadalanan.

Kun tabunan man gani, magbungdo nga makahatag og epekto sa pagdagan sa mga sakyanan. Ingon ba lang g’yod niini ang inyong trabaho?

* * *

Natapos na lang ang tuig nga si Arnel Tancinco sa Citom wala gayod makatuman sa iyang gipanghambog. Maayo la’s hambog ning tawhana nga hatagan kuno dayon niya og aksyon ang reklamo.

Kun tingsweldo na gani, aksyonan tingali dayon ang pag-adto sa ATM. Ingon ba niana ang maayong alagad sa lungsod Arnel?

Kanang building nga anaa kilid sa sapa sa Echavez, gasigi ko og hagit kanimo nga imo usab nga buhaton kun unsay gihimo nimo sa uban aron matarong ang parking sa mga sakyanan, apan wala.

Magpabugnaw ka man lang tawon diha sa imong opisina uy. Ang kilid sa Bayantel, dapit sa D. Jakosalem side, wala pa gihapon nimo aksyoni.

Hadlok ka no? Ngano man? Duna bay bug-at nga rason? Bisan ang imong mga sakop nagduda na baya nimo Arnel.