Sa diha pa tas gobiyerno, ang atong trabaho nakahatag kanatog higayon pag-suroy-suroy, paglibutlibot sa tibuok lalawigan sa Sugbo sa makadaghang higayon. Panahon pa kadto ni Director Godo Roperos, sa Department of Public Information, usa sa mga pioneer ug nagmugna sa ARENA 7, kon Association of Regional Executives of National Agencies in Region 7.
Usa sa mga concern nga among giatubang mao ang pangutana kun kining gitawag nga development nakaabot ba sa kalungsuran – sa countryside. Akong hinumduman nga sa among mga miting sa opisina, mangutana si Godo kun “for whom is development?”
Na-felt ba sa kabarangayan ug kasityohan ang “presence of government” sa ilang dapit?
Among nakita, ug kamo sayud niini, nga ang mga dagkong mejoras, ang kaugmaran dinhi ra sa mga urban center ibubo. Ang countryside underdeveloped kaayo, kun duna may development, ilabina sa mga dapit nga diyutay ra ang botante. Politika!
Maayo man gani karon nga niining pag-suroy-suroy ni Gobernador Gwen sa kalungsuran, gihatagan nag igong pagtagad ang countryside.
Ug usa sa nagkinahanglan sa unang mga pagtagad mao ang ikaduhang distrito sa atong lalawigan, kay itandi sa ubang mga distrito, hinay kaayo ang development, kinadaghanang lungsod, hinungdan nga lisud ang paghatag og igong atensiyon sa tagsatagsa ka gagmay’ng lungsod.
Maoy hinungdan nga kining balaudnon ni Rep. Pabling Garcia, pagbuak sa second district, ug pagtukod og ikapitong distrito, laudable kaayo, if not kinahanglanon kaayo.
Adunay mga huhungihong nga gihagad kono si Cerge Remonde pagdagan sa south district dinhi sa dakbayan sa Sugbo. Mibalibad si Cerge kay adto kono siya mo-concentrate sa iyang lungsod sa Argao. Mag-mayor tingali.
Apan, niining mga lakang karon pagmugnag 7th district nga pagasakpan sa mga lungsod sa Argao, Alcoy, Boljoon, Dalaguete, Oslob, Samboan ug Santander, makahatag kinig higayon kang Cerge paglansar pagka-Kongresista sa bag-ong distrito. Ug ato na unyang makita ang kalit nga development sa maong mga lungsod, ug appropriately matubag na ni Rep. Cerge Remonde ang pangutana kanhi ni Godo nga “for whom is development?” Pagkakaron, wa pay klaro kun kinsa ang mangahas pag-atbang ni Cerge.