Walay trampas ang pagbasura

Wala g’yod toyua sa kadagkoan sa dakbayan nga did-an ang Kapitolyo nga makasalmot sa subasta pagpalit og yuta diha sa South Road Properties.

Ang pagmugna sa ordinansa nga naghulma sa Joint Venture Selection Committee, apil na ang iyang mga lagda, gihimo dihang wala pa mopadayag ang probinsya sa ilang tinguha pagsalmot sa SRP bidding.

Suheto ko sa maong isyu sanglit anaa ko madistino sa City Hall isip reporter ug nagsunod kanunay sa kalamboan sa City Hall.

Gibutang nang daan diha sa mga lagda sa joint venture agreement nga ang makasalmot sa subasta pagpalit og yuta sa SRP mao ra ang mga “private entity”

Sa wala pa mopagawas og hukom ang joint venture selection committee nga gipangulohan ni city administrator Francisco Fernandez, daan na ko nga nasayod nga ingon g’yod niini ang sangpotan.

Husto si Fernandez nga wala sila’y mahimo kay anaa man sa ordinansa nga walay labot ang mga government units sama sa probinsya sa Sugbo pagsalmot sa bidding.

* * *

Dakua nga dimalas ang nasugatan sa akong amigo nga si Koronel Benjamin Miaga.

Igo-igo g’yod ang gasto niya pagbayad sa iyang nabiktima dihang naatrasan sa gimaneho niyang Pajero.

Si Miaga daku-daku g’yod og nakubra dihang siya miretero sa katungdanan, apan tan-aw nako maiban-ibanan g’yod tawon ni sa iyang magasto pag-atiman sa mga nadam-agan sa iyang sakyanan.

Merry Christmas na lang nimo higalang Ben.

* * *

Grabeng taasa sa pahuway sa mga kawani sa kagamhanan uy. Apan kami nga anaa sa pribadong sektor, ilabi na namong mga sakop sa media, ang pahuway karon ra ug ugma, ingon man sa bag-ong tuig.

Apan sagdi lang, walay problema tungod kay ang amo serbisyo publiko man.

* * *

Balikon nako ang pagpahinumdom ha, likayi ninyo ang paggamit og mga dagko nga matang sa pabuto, kun mga pabuto nga daghan og pulbora.

Unya, ang mga bata ayaw tuguti nga mopaduol sa mga fountain type nga pyrotechnics kay dunay fountains nga dili maayo nga pagkabuhat, mobuto na.

Kadtong mga hubakon, tago g’yod tawon mo kay pwerte na makapahubak ang aso sa mga pabuto. Apan labaw sa tanan, kadtong mga dunay armas, ayaw tawon ninyo gamita kini sa pagpabuto atul sa pagsugat sa Pasko ug Bag-ong Tuig.

Kun dili g’yod ninyo kapugngan, hala siguroa nga ang bala dili makaigo og tawo. Ok ba?

Wala pa g’yod ko malimot sa nahitabo adtong Caroline Tolentino, nueve-anyos nga bata nga anak og taxi driver. Nagpaabot tawon siya sa iyang Papa nga mopauli kay dad-an siya’g pansit nianang Bag-ong Tuig.

Diha siya gabarug atubangan sa Cebu Plaza Hotel kaniadto dihang misugod na ang paka-paka sa mga buto nga misugat sa bag-og tuig. Wala pa ang iyang Papa maabot.

Samtang gakalingaw siya’g tan-aw sa mga nagpabuto og rebentador, kalit lang siya nga natumba kay naigo sa saag nga bala diha g’yod sa ulo.

Kamong dunay armas nga hilig kaayo magpabuto, kun ibutang nga kamo ang mahitaboan niadto, unsa kaha’y inyong bation? Ako mibati g’yod kaayo tungod kay nakakita ko sa maong talan-awon kay diha pa ko niadto sa police beat.

Usbon nako, alang sa mga gun holders, pagbaton g’yod og disiplina. Gamita ang armas dili aron ipanghambog kun dili proteksyon sa imong kaugalingon.

Merry Christmas kanatong tanan!