Kawat

"Good morning, Sir. Naa lang koy gamay nga ipaabot nimo. Bahin nis kawat diha sa Pusok, Ibabao, Lapulapu City. Mora man og nanggara ni silang mga kawatan pag-ayo. Wala man goy epek ang pagpa-blotter." -- 0927-4386381 (Sent: 09:58:42am--October 26, 2008)

Wala gyoy epek ang pagpa-blotter kun dili kini himoan og aksiyon sa kapolisan. Kun kutob lang sa pagpa-blotter ug walay aksiyon, wala gyoy mahitabo.

Ang gikinahanglan mao ang aksiyon sa kapolisan kun adunay magpa-blotter sa ilang buhatan. Kinahanglang mohimo silag lakang aron masikop ang mga kawatan!

Aksiyoni!

* * *

"Palihog kog patik ini aron makabantay ang tanan. Diri sa eskina F. Gonzales ug Osmeña Blvd. naay mangingilad nga mosugat sa mga tawo ug moingon nga puwede magtanong. Unya kun naa nay mailad manghatag dayon og santos (kang Sto. Niño nga gagmay) nga pinalit niya og P9 unya pabayran sa iyang mailad og P29.95 kay gisugo kuno siya sa pari kay naay project. Puwerte ra bang mosuyop ning tawhana nga naila lang sa ngalan nga Mr. Magtanong. Daghan nang nailad niya. Magsugod ni siya alas 7 sa buntag ug mouli alas 4 sa hapon. Samok kaayo ning tawhana. Tanang tawo labina og ignorantehon og nawong iyang sugaton ug pangutan-on dayon ilaron. Hasta mga estudyante iyang ilaron. Angay ni siyang dakpon sa mga pari labina manggamit siya ngan sa pari. Kada adlaw gyod ni siya mangilad." --0906-7092771 (Sent: 03:38:22 pm--October 26, 2008)

Gisumbong na kini si Mr. Magtanong dinhi sa atong lindog pipila na ka tuig ang nakalabay. Abi kog nihunong na kining tawhana sa iyang modus operandi. Hangtod karon nagpadayon diay gihapon siya.

Atong sangpiton ang atensiyon sa mga tanod ug polis sa pag-counter check ning sumbong sa atong texter. Mas maayong mapanid-an ninyo kini si Mr. Magtanong aron mabadlong o ba kaha madakpan siya sa higayon nga masakpan siya sa akto nga nagpasalir sa iyang tinonto.

Hinaot usab unta nga makabantay ang atong kaigsuonan aron dili sila mabiktima niining mangingilad nga si Mr. Magtanong.

(Sumbong ug reklamo? Text sa 0910-8105522).