Ang siyam ka kaadlawon nga Misa de Gallo nagsugod na niadtong Martes. Usa kini ka maanindot nga paskohanong tradisyon sa mga Katolikong Kristiyanos nga nakapuno sa pagkabililhon sa Pasko.
Apan usa ka Katolikong pari misulti sa Banat News nga siya nasagmuyo nga ang Misa de Gallo gihimo ra sa uban nga kalingawan.
“Moadto sila sa simbahan dili aron mosimba kun dili mahugoy-hugoy ug kun dili gani matulog ra samtang nagpadayon ang selebrasyon eyukaristika,” suma pa niining pari.
Matud niya kadtong motambong sa Misa de Gallo aron lang matug sud sa simbahan, mas maayo unta nga adto nalang sila pungko ilawom sa akasya ug matug.
Nakasabot kami sa kasagmuyo ning maong pari. Kay kami nagtuo nga ang paglingaw-lingaw atol sa Misa de Gallo, lakip na ang pagkatug sud sa simbahan, usa ka insulto sa Ginoo kinsa alang Kaniya gipahigayon ang Misa de Gallo.