Hangtod karon nagpadayon nga sibaw ang reklamo sa mga tinun-an ug senior citizens sa kapakyas sa bus, jeepney ug taxi drivers pagtahud sa ilang 20% nga diskuwento sa plitehan. Kini bisan sa pasidaan sa LTO ug LTFRB nga silotan ang mga drayber ug operators nga molapas sa balaod. Kini bisan sa pasalig sa transport groups nga disiplinahon ang ilang mga sakop nga mohikaw sa mga benepisyo sa mga tinun-an ug senior citizens.
Pipila lang, kun duna man, ang nasilotan sa abusadong mga drayber. Mahimong tungod ni sa mosunod:
* Kapakyas sa mga pasahero pagreklamo ug pagtunga sa husay sa LTO; o
* Namakak ang LTO, LTFRB ug transport groups.
* * *
Ang mga reklamo nga gibarugan sa mga tinun-an ug senior citizens kasagaran nisangpot sa pagkasikop sa mga drayber, pagmulta nila ug pagkasuspenso sa ilang mga lisensiya. May pipila nga naareglo kay ang mga drayber nga isog kaayong namalibad sa diskuwento kalit lang nga nagluhudluhod ug nagpakiluoy sa mga biktima.
Apan di tanang mga biktima makahigayon sa pagreklamo. Mas gamay nila ang may kaisog ug panahon sa pagtunga sa husay ug pag-atubang sa mga drayber nga ilang gireklamohan. Lisod silang pasabton nganong sila pay nabiktima sila pay kinahanglan nga mopalta sa trabaho aron lang maatiman ang ilang mga reklamo.
* * *
Mas laktod ug mas epektibo unta kun ang LTO ug LTFRB ug kadagkoan sa transport groups ang mangunay pagpatuman sa lagda. Tinuod nga di silang kaato pagbadlong sa tanang drayber nga abusado ug sa paglaban sa tanang pasahero nga mabiktima. Tinuod nga di silang kabadlong sa tanang kalapasan sa tanang higayon.
Apan makahimo sila pagsakay sa buses, jeepneys ug taxis isip mga pasahero aron pagpangunay pagsikop sa mga drayber nga malapason. Di nila masakyan ni masakpan ang tanan apan ang paghimong sampol sa pipila makapakurog na sa uban. O bisan makaaghat man lang sa uban sa paghunahuna og makadaghan sa di pa manglubag sa sunod nilang mga pasahero.
* * *
Sa pikas nga bahin, ang pagdumili sa mga drayber paghatag sa diskuwento ngadto sa mga tinun-an ug senior citizens wa manukad sa ilang kahigwaos paglapas sa balaod. Kun dili sa usa ka makiangayon kaayo nga mga kalibogan:
* Nganong sila may papas-anon sa 20% nga diskuwento nga sila mismo wa mang kadawat og bisan unsang benepisyo gikan sa kagamhanan?;
* Nganong ang mga politiko nga nagpa-pogi paghatag sa diskuwento wa man mohatag sa mga drayber og kahigayonan pagbawi benepisyo gikan sa kagamhanan?;
* Kun ang mga botika nanagana paghatag sa diskuwento sa mga tambal sa senior citizens kay dugay kaayo silang mataplan sa BIR, ang mga drayber pa kaha nga gawas nga mas gamay ug kita wa pa gyo’y bisan gamay nga kahigayonan nga maulian?
* * *
Email:leo_lastimosa@abs-cbn.com