Gipangayoan og P2,000
Gikan sa cell. no. 0921-5445899: "Good PM, Sir. Ako lang ipadangat sa imong lindog ang kabahin sa gibuhat aning mga taga civil registrar nga incharge sa paghimo og supplemental affidavit. Gipangayoan ko og P2,000 kun gusto gyod kuno ko nga madali og process. Gidaginot pa gyod ang akong P100 para kuno sa notaryo. Wa ko hatagi og resibo." -- 0921-5445899 (Sent: 10:03:26 am--August 28, 2008)
Wala man ibutyag sa atong texter kun asang dapita nahitabo kining iyang kasinatian pero akong naanalisar nga posibleng nia ra gyud kini sa Metro Cebu. Morag naa ni sa usa sa mga component cities sa Sugbu.
Ang akong ikasulti mao nga morag nisiwil ang motibo sa taga civil registrar nga nangayog P2,000 sa atong texter. Labina kay wala kini moisyug resibo ngadto kaniya.
Sa sinultihan pa lang daan sa maong taga civil registrar nga "kun gustog madali ang process", klaro kaayo nga "padangog"ang gipangayo niining P2,000. Ang pangutana kun segurado ba gyod kaha nga madali. Wala ba lang kaha linglaha ang atong texter?
Akong sugyot ngadto sa atong texter mao nga i-refer kining maong kasinatian nimo ngadto sa labaw'ng opisyal sa civil registrar diha sa inyong dapit. Labing maayo sab nga idangop mo kini ngadto sa city councilor sa inyong lugar nga maoy chairman sa committee on ethics.
Sa akong tan-aw, lagmit may tulubagon ang empleyado sa civil registrar's office ubos sa probisyon sa R.A. 6713 kondili niya ikapasabot ug ma-justify ang iyang pagpangayo nimog P2,000.
* * *
Ang atong texter nga naggamit sa cell. no. 0929-7163900 mi-text nako niadtong Agosto 28, 2008 (Sent: 09:15:25am) ug mitaho nga sa usa ka barangay sa lungsod sa Minglanilla naay tulunghaan sa high school nga ang tuition fee tag P885 apil na ang test paper. Pero naa sad kunoy ubang maestra nga mangayo gyod og bayad para sa test paper.
Gusto sa atong texter nga maaksiyonan ni sa DepEd. Andam mokooperar ang atong texter. DepEd, aksiyoni!
* * *
(Sumbong ug reklamo? Text sa 0910-8105522)
- Latest
- Trending
