Kining panguot usa sa angay bantayan sa atong kaigsuonan. Atong nareyalisar ang dakong panginahanglan sa pagpahimangno sa atong kaigsuonan mahitungod niini kay posibleng mabiktima kita niini sa bisan asang dapit ug sa bisan unsang panahon. Kun ikaw makursonadahan sa mangunguot, magmata ka na lang og morning kun dili na makabantay nga nawagtang na diay ang imong pitaka ug valuables.
Usa ka magbabasa ning lindog mi-text nga nagkanayon: "Good day. Usa ako ka tigbasa sa imong column nga Modus sa Banat News. Ang akong sumbong mahitungod sa mga mangunguot sa kadalanan. Mahitabo kini ilabi na sa mga hunonganan sa mga sakyanan. Ang ilang modus kay manan-aw sa mga tawo nga mosakay. Kanang naay cellphone maoy ilang pilion. Kun mopara na gani ang gusto nilang biktimahon, usa nila mounag sakay sa ilang biktimahonon. Unya mokanaog lang sab dayon kay nasayop kunohay pagsakay sa dili mao nga rota. Dunay duha ka tawo nga mokapyot. Mopuli tong usa sa gihawaan sa nikanaog. I-sandwich ka nila. Unya tumban ang imong tiil. Ang kauban sa nagtunob nimo nagkuot na diay sa imong bolsa. Usa ko sa nabiktima nila. Magdala ni sila og knapsack." -- 0920-4418660 (Sent: 12:32:36 pm--January 15, 2008)
Daghang salamat, higalang texter, sa imong pagpaambit sa imong kasinatian. Hinaot nga kining estilo sa modus operandi sa mga mangunguot nga imong gibutyag makatabang sa atong kaigsuonan aron sila makabantay sa mga badlongon sa katilingban.
* * *
"Good PM, Sir. Kanang mga dispatser sa Colon, ba. Magsige man silag pangayo og kuwarta. Unya dili ra ba ipalit og bugas. Ipalit hinuon og shabu. Luoy kaayo ang mga pamilya ana nila." -- 0909-3416002 (Sent: 08:05:14 pm--January 16, 2008).
Nakapuwerhisyo kanang mga tawhana sa mga PUJ drivers. Hinaot unta nga mapatuman na sa hingpit ang anti-dispatching ordinance aron mapitol na kanang mga tawhana. Angay unta silang pahamtangan og bug-at nga silot kay usa man ka dagway sa extortion kanang ilang gibuhat. Pating kaayo kanang maong mga dispatser. Dili maayong pasagdan lang kana silang magpadayon sa pagpamiktima sa mga drayber.
* * *
(Sumbong ug reklamo? Text sa 0910-8105522)