Kasaligan pa ba ang atong hukmanan?

Ginaingon nga ang hukmanan mao ang kataposang magbalantay sa nasud nga demokrasya. Mao kini ang moboyag sa unsa mang kalapasan nga mahimo sa uban, ma stado man o ma pribado nga tawo. Nagpahipi man lamang tuod ang gahom niini kun ikomparar sa laing duha ka sanga sa gobiyerno nga mao ang ehekutibo ug lehislatura apan aktibo kini kun imo nang duolon aron dangpan sa imong mga reklamo. Apan unsa may mahitabo sa atong demokrasya kun ang kataposang magbalantay niini nasudlan na sa kagaw sa corruption? Unsa man unyay epekto niini sa katawhan kun ang institution nga ilang gisaligan nga magbalantay hinay-hinay na kining gikot-kot sa bakokang sa influencia? Kinsa pa man unyay motuo sa atong hukmanan kun ang mga hukom niini wa na ibase sa merito sa kaso kun dili gibasi na kini sa koneksiyon ngadto kanila sa mga reklamante? Mosalig pa ba kaha ang katawhan sa atong hukmanan kon kanunay natong madungog ang mga pasangil nga corruption ug pagpamaligya sa pipila ka mga justices sa mga kaso nga ilang gipanghoptan sa kantidad nga minilyon?

Dinhi sa Sugbu adunay TRO for sale. Gani ang korte suprema naglaraw nga wagtangon na lamang ang court of appeals dinhi sa Sugbu tungod kay gipamaligya ang pagkuha og Temporary Restraining Order kon TRO.

Didto sa kaulohan gipaimbestigahan usab sa Korte Suprema ang giingong dirty dozen sa court of appeals.

Ang Korte Suprema wa upod makalingkawas sa mga pasangil sa corruption. Kaniadtong miaging tuig mipatawag og usa ka special session ang labaw’ng hukmanan sa iyang mga mahistrado aron tukion ang pasangil nga 10 milyones ka pesos nga suborno ngadto sa usa sa iyang mahistrado.

Ang Political and Economic Risk Consultancy kon PERC nga nakabasi didto sa Hong Kong sa iyang gihimong pagtuon kaniadtong miaging tuig nagkanayon nga ang Pilipinas mao na ang pinaka-kurakot nga nasud sa Asya, unya subo nga palandungon nga apil na niini ang atong mga hukmanan dinhi sa nasud.

Niining bag-o si Mr. Flaviano Manalo usa ka opisyal sa Workers Union nga nakabasi didto sa Ilo-ilo midangop sa akong tulomanon sa radyo sa DySS tungod sa iyang giingon nga kadudahang decision sa Korte Suprema sa ilang kaso nga gipasaka. Kon unsa man kini ato kining ipadayon unya sa Martes sa sunod semana.