Pakyaw sa taxi

“Good day, Sir. Angay bantayan sa mga awtoridad ang Pier 4. Dihang dapita naay mga taxi nga puro lang nag-atang og mga pasahero nga mopakyaw nila. Dili sila mogamit og metro.” -- 0910-3009006 (Sent:07: 43:05pm-- August 22, 2008)

Mao bitaw kini nakapait kun manakay tag taxi diha sa pier area. Naa man tuod ing daghang taxi pero dili mopasakay kun dili ka mosugot sa ilang kondisyon nga pakyaw.

Angay unta nga i-counter check sa proper authorities kining gihimo sa daghang taxi drivers nga dili mogamit sa ilang taxi meter kay pakyaw maoy gusto. Dili maayo ang ilang gibuhat!

Awhagon sab nako ang mga sumasakay nga kun makasugat mo’g taxi driver nga pakyaw-pakyaw maoy kondisyon, ayaw ninyo palabya ang higayon. Isumbong ninyo ang maong driver ngadto sa mga awtoridad. Nagdasa man god ni sila kay wala may nakahimo pagputol sa ilang sungay!

* * *

Dunay nag-text nako niadtong Agosto 25, 2008. Nanghulga siya.

Ang iyang text nagkanayon: “Hinay-hinay lang sa imong pagpangatake aning pamantalaan, Brod. Basin ikaw unya ang ma-headline kun buk-an tika’g bagolbagol.” -- 0918-3744043 (Sent: 03:54:50pm)

Nakaseguro kong guilty ang nag-text nako’g ingon ini bahin sa akong gihisgotang mga illegal nga kalihokan dinhi ning pinobre kong lindog.

Ang nagsili lang maoy hangan! Alang nako, sila’y angay buk-an sa bagolbagol kay sila man ang naghimo’g kalapasan sa balaod.

* * *

Tuod diay, akong pangumostahon ang gikataho sa atong texter niadtong nakalabay nga pipila na ka bulan bahin sa giingong drug den diha sa A. Lopez, Labangon. Naaksiyonan na ba kini sa mga awtoridad?

Kun wala pa, mas maayong hatagan na kini’g aksiyon. Sumala sa atong tipster, ang manag-ig-agaw nga sila si Edgar ug Cardo maoy responsable sa operasyon sa shabu diha sa maong dapit.

Mas maayong i-counter check sa mga tinugyanan sa balaod kining taho sa atong tipster aron masuta kun tinuod ba kini o dili.

Aksiyoni!

* * *

 (Sumbong ug reklamo? Text sa 0910-8105522)