Kaylagi, temporaryo ra kining atong pagpuyo ning kalibutana, ug tungod kay kining maong kalibutana problema naman mismo, way bisag usa kanato (ma-presidente kag ma-garbage collector, ma-Euro general o ma-private first class, o ma-Republican o ma-Democrat, kitang tanan di gyud makalingkawas sa problema.
Lainlain lag degree. Apan, ang labing daku nga problema, alang kanako, mao ang pag-abot sa panahon nga bisan ang kaugalingon natong tanlag mahadlok nang motulisok kanato gumikan sa katig-a ug kabaho na sa atong kasingkasing ug kabaga na sa atong nawong.
Ang maong problema, lisud nang sulbahon, bisag pila na ka trillion ang atong makurakot, di na gyud ta madutlan. Ato na lang pauyonan ang giingon nga “what are we in power for?”
Pastilan, maunsa man ang tanang pasidungog ug mga pagdayeg nga ihatag kanato ning kalibutan, gumikan sa atong salapi ug gahom, kun mangyam-id kanato ang Nagbuhat kanato?
Anyway, maunsa man ang mga problema, mga pagsulay, ug mga pressure nga mohamag kanato, ayaw padaug, ayaw pagsugot nga mao na kini ang magbuot ug magkontrolar kanato. Kun bug-at na kaayo, suway og sangpit sa Ginoo (kun motuo kag Ginoo).
Aniay gikan na usab ni Kuya Boy Odilao, presidente sa Association of Former Regional Executives of National Agencies – Region 7 (AFRENA 7), akong i-share nimo, Dro: “ All the waters in the ocean could never sink a ship, unless it gets inside. Likewise, all the pressures in life can never hurt us, unless we let it in.”
Busa, Dro, ayaw pasudla sa imong kahiladman ang bisan unsa nga pressure nga mohapak kanimo. Santaa dayon. Sa gate pa gani, sa pultahan pa, balibari na. Sama sa kadagatan ayaw pasudla ang tubig aron di ka malunod ug dili malumos. Tingalig ma-Princess of the Stars.
Ayaw sag likayi ang mga pressure, kay mogara ni, mosamot ang kasakit. Atubanga, kulataha – apan ayaw idibdib. Ayaw sugot nga mao nay mokontrolar sa imong emotion. Alkanse ka.
Akong usbon ang giingon ni Kuya Boy: “All the pressures in life can never hurt us, unless we let it in.” May pagka-true, di ba,Dro?