Illegal terminal

Dili malalis nga daghan kaayong mga driver dinhi sa dakbayan ug lalawigan sa Sugbu nga mga abusado ug mga badlongon. Usa sa atong matumbok mao kanang nagmaneho sa mga sakyanang depasahero nga anha mo-pick-up og pasahero gawas sa South Bus Terminal.

Illegal terminal ang ilang gibuhat diha. Klaro kaayong naglikay sila sa balayranan kun mosulod pa sila sa SBT. Pero dili makiangayon ug dili makataronganon ang ilang gihimo. Gawas nga wala makasapi ang SBT nianang ilang kalaki, nakalapas usab sila sa pipila ka lagda sa trapiko. Naka-contribute usab sila sa kahuot sa trapiko nianang dapita.

Dugay nang gibuhat sa maong mga driver ang pagpamik-ap og pasahero diha sa gawas sa SBT. Mas klaro kanang ilang modus panahon sa kaadlawon. Dili sila mosulod sa terminal ug anha lang sa gawas -- sa atbang sa SBT-- manawag sa mga pasahero. Angayan pahamtangan og tukmang disiplina o ba kaha patagmon sa kadumalahan sa SBT ang mga driver nga nagdala nianang maong mga sakyanang de pasahero.

* * *

Usa ka magbabasa ning lindog nga nagpaila lang ang usa ka empleyado sa usa ka shipping company kansang mga barko nagbiyahean sa rotang Cebu-Bohol ug Cebu-Leyte mi-text nako gamit ang cell. no. 0916-2518378 aron pagpadangat sa iyang reklamo kalabot sa ilang suweldo.

Sa iyang text kanako niadtong September 25, 2008 (Sent: 06:07:29am), iyang gibutyag nga 3 months delayed na ang ilang suweldo. Wala pa gyud kuno i-remit ang ilang SSS contributions 6 years na.

Inigkabasa ninyo niini, medyo dugay-dugay na ang reklamo sa atong texter. Pero kun hangtod sa pagkapatik ning iyang reklamo wala pa gihapon ma-release ang ilang suweldo, haskang paita.

Bahin sa SSS contribution, idangop kana ninyo sa legal division sa SSS. Ang maong buhatan na mismo ang motawag sa attention sa shipping company aron patubagon nganong wala i-remit ang inyong kuwarta. Mag-atubang sila’g kasong estafa kun magkina-unsa.

Hinaot unta nga magtarong na ang maong shipping company ngadto sa ilang mga empleyado.

* * *

 (Sumbong ug reklamo? Text sa 0910-8105522)