Sa hawanang sagrado

NOBIYEMBRE 9, 2008: Piyesta sa Dedikasyon sa Katedral ni San Juan sa Letran

Mga Pagbasa:    Ex. 47:1-2,8-9,12/Sal. 46/1Cor. 3:9c-11,16-17/Jn. 2:13-22

Dili pa lang dugay nahimong nabaniog ang balita mahitungod sa managhigugmaay nga nagtikdol-tikdol sa ilang lawas didto sa simbahan ni Sta Teresa sa Dakbayan sa Talisay. Sa dakong adlawan pa gyud nila buhata ang ilang pagromansa. Butang nga nakapapungot sa mga tawo ug nakahatag og kalingawan sa pipila. Pastilan kun biga na ang magpamidla!

Tinuod ang templo mao ang sentro sa pagtuo sa mga Judio apan dili ikalimod nga kini usab ang sentro sa mga nagkadaiyang negosyo. Kay asa gani ang daghang mga tawo, atua usab didto ang nagkadaiyang mga patigayon ug mahimo man gani kining himoon diha mismo sa hawanang sagrado! Ang atong Ginoo bisan sa iyang pagka-Dios ang mipakita sa iyang kapungot tungod ning maong abuso. Gilimpiyohan niya ang templo pinaagi sa simbolikanhong paglimbuwad sa bisan unsang nahimong kahimanan aron ang kasagrado sa templo mayaga-yagaan.

Sa atong kinabuhi ning atong kapanahonan dili ikalimod nga nahisama kita sa mga negosyante nga mangita lang og lugar aron makapabor diha sa pagtumod sa atong tagsa-tagsa ka mga baligya. Ang nakapait kay usahay by hook or by crook ato pa ganing gamiton usahay ang Ginoo aron kita makasapi dili ba? Usahay makaingon na lang ako nga mas maayo pa tingaling pahilakon na lang ang atong mga patron aron lana nga gamhanan mahalin ug sa mga debotos hugpaan! (Pwera gaba lang). Dili balanse ang atong pagbansay ug pagsabot sa dakong bili sa templo sa Dios. Nindot baya ang ritwal apan wala kini magpasabot nga balaanon lang ang templo pinaagi kanila lamang kondili ang resulta kun unsang matanga kita sa mga tawo inighuman nato og sulod sa atong mga simbahan.