Hoy Arnel, lihok na!

Nalipay ko kay mipasalig kagahapon ang kadagkoan sa lainlaing kahugpongan sa mga vendors nga motabang sila pagbantay nga wala nay mamaligya og mga hupas ug “adulterated” nga pagkaon sa Carbon market.

Gipatawag sila ni higalang Raquel Arce, ang market administrator sa dakbayan sa Sugbu, tungod niadtong pagkasakmit sa mga delatang pagkaon apil na kadtong mga karne nga makadaut na nga kan-on, apan gibaligya gihapon.

Misanong sila sa awhag ni Arce nga kun may mamatikdan sila nga mamaligya og mga hupas na nga matang sa pagkaon, mohilom lang sila pag-report ngadto kaniya. Ingon lang ana nga tabang isipon na sa City Hall nga daku na kaayo og tampo.

Gibutyag sa mga tindera kagahapon nga duna diay mga kauban nila nga mamaligya og mga binuhat ra nga suka nga sila-sila ray naghimo. Tubig ra kuno sa butong ang himoon, butangan og kemikal nga “glacial” ug evaporated milk, daug na.

Papilion pa kuno ka sa tighimo kun unsay lami sa suka nga imong paliton, mahimong may pagka aslom ba.

Unya, may nagsigi diay kuno gihapon og pamaligya og mga asukar nga gikan sa laing nasud nga makadaut sa panglawas sa katawhan. Kadto ba nga gitawag og “magic sugar” nga bisan gamay ra nga asukar pwerteng tam-isa na.

Kining maong matang sa asukar, giingong kinaham kaayo sa mga mamaligya og juice nga sagad ikarga og karomata kay makadaginot man sila tungod kay gawas nga medyo barato, gamay lang nga asukar ang gamiton, tam-is na.

Apan ang problema mao nga makadaut kini sa panglawas sa mga tawo nga makakaon o makainom sa mga gigamitan niining maong asukar.

Awhagon nako ang mga tindera nga nasayod niini, kun kinsa kadtong namaligya niining maong matang sa asukar, nga pahibaw-on dayon ninyo ang atong market administrator.

* * *

Kini bitaw’ng mga gagmay’ng passenger jeepneys nga gihimo gikan sa Multicab, angay kini nga did-an na sa pagpa-operate kana kun ang design niini dili nila usbon aron dili makadisgrasya.

Nakasakay ko og PUJ kagahapon nga biyahe og Urgelio, pwerteng muboa sa atup. Inig sakay nimo maglisud ka, pangka god dayon ang akong ulo sa dayon pa lang pagsaka.

Dayon, ang ulo sa mga pasahero maigo usab sa gunitanan nga gipahimutang dapit sa atop kun dunay kalit nga panghitabo. Basta kay sa akong tan-aw, mora tawon og magtikutkot ang mga pasahero.

Awhagon nako sila si Konsehal Jack Jakosalem, Edgardo Labella ug ubang konsehal nga himoi ninyo kini og lakang Sir. Dili maayo kun kini maoy magdaghan nga matang sa sakyanan.

* * *

Tan-awa ra g’yod kini si Arnel Tancinco sa Citom, nagpasiatab nga iya g’yod nga gipatuman ang tukmang lagda sa pag-parking og sakyanan.

Gawas diha sa imong opisina Arnel ug tan-awa ang matang sa pag-parking sa mga sakyanan nianang building nga tupad sa National Statistics Office.

Misalir na ang imong pagpanghambog. Namatud-an na g’yod nga wala kay baruganan sa imong mga gipanulti. Wala g’yod ka mauwaw nga mipilit diha sa imong trabaho nga maayo lang kas sulti.

Pag-agi nako didto sa Salinas Drive niadtong Huwebes sa hapon, pwerteng bisiha kay ang sakyanan nga wala sa tukmang pag-parking, migawas gikan sa gi-parkingan sa usa ka tunghaan.

Unsa, nabuta ang imong mata Arnel nga wala makakita ani? Pangita’g laing trabaho oy nga makaya nimo kay mahadlok ka man kaha mopatuman sa balaud sa mga kwartahan. Ikaw ang gitugyanan sa pagdumala sa Citom apan wala kay ayo.